बुटवल असार ४,नेपाली कांग्रेसले राजधानीका केही स्कुलमा भएको बम विष्फोट र केही स्कुलमा शंकास्पद बस्तु राखिएको घटनाको निन्दा र विरोध गरेको छ ।काग्रेसका मुख्य सचिव कृष्णप्रसाद पौडेलले प्रेस विज्ञप्ति जारी गरि काठमाडौँको जोरपाटी स्थित आकाशदिप स्कूल र मनकामना उच्च मा.वि.मा भएको बम विष्फोट, वौद्ध स्थित राई स्कूल, इस्टपोल स्कूल र ललितपुरको रेडियन्ट स्कूलमा शंकास्पद वस्तु भेटिएको घटनाप्रति पार्टीको गम्भीर ध्यानाकर्षण भएको उल्लेख गर्नुभएको छ । शान्ति, विकास र समृद्धिका वाहक मानिएका बालबालिकाले भयरहित वातावरणमा शिक्षा आर्जन गर्न पाउने नैसर्गिक अधिकारमाथि यो घटनाले ठाडो प्रहार गरेको भन्दै विज्ञप्तिमा शान्ति क्षेत्रको रुपमा रहेको विद्यालयहरुमा भएको यो घटना अत्यन्त निन्दनीय रहेको उल्लेख छ । काग्रेसले बालबालिका, शिक्षक, अभिभावक लगायत समाजमा भय, त्रास र डरको वातावरण सिर्जना गर्न खोज्ने यस्ता आपराधिक क्रियाकलापमा संलग्न व्यक्तिहरुको तत्काल खोजी गरी उनीहरुलाई कडा भन्दा कडा कार्वाही गर्न सरकारसँग माग पनि गरेको छ ।
