बुटवल, असोज ५ । प्रेस काउन्सिल नेपालले ३३ जना पत्रकारलाई पुरस्कृत गरेको छ । काउन्सिलको ४७ औं वार्षिकोत्सवको अवसरमा विभिन्न विधामा सक्रिय ३३ जना पत्रकारलाई पुरस्कृत भएका हुन । राष्ट्रपति भवन शितल निवासमा बिहिवार आयोजित कार्यक्रममा पुरस्कृत ब्यक्ति र संस्थालाई राष्ट्रपति विद्यादेवी भण्डारीले पुरस्कार प्रदान गर्नुभएको थियो । एक लाख पाँच हजार रुपैयाँको सुरेन्द्रबहादुर बस्नेत पत्रकारिता पुरस्कारबाट तरुण साप्ताहिकका काग्रेस निकट पत्रकार परशु घिमिरे, एक लाख पाँच हजार रुपैयाँ कै गोपालदास पत्रकारिता पुरस्कारबाट प्रधानमन्त्रीका प्रेस सल्लाहकार माओवादी केन्द्र निकट गोविन्द आचार्य पुरस्कृत हुनुभएको छ । त्यस्तै बुटवल टुडे दैनिक आचारसंहिता पुरस्कारबाट पुरस्कृत भएको छ । साहित्य पत्रकारिता पुरस्कारबाट विवश वस्ती पुरस्कृत हुनुभएको छ ।
यसैगरी १५ हजार रुपैयाँ राशीको स्तम्भ लेखन पुरस्कार कृष्णमुरारी भण्डारी, गोविन्दप्रसाद भट्टराई र दयाराम डांगीले पाउनुभएको छ । भाषागत पत्रकारिता पुरस्कार गोपाल छाङ्छा राईलाई तथा सशक्त सञ्चारकर्मी पुरस्कार डीआर पन्त, पवन आचार्य, डा. राजेश झा अहिराज र महेश दासलाई दिइएको छ । यसैगरी समावेशी पत्रकारिता पुरस्कारबाट रोशन सावाँ, माधवप्रसाद चम्लागाईं, लक्ष्मीकुमारी चौधरी, सुशील दर्नाल, विष्णुलाल बुढा र शीतल महतो पुरस्कृत हुनुभएको छ । महिला सशक्तिकरण पत्रकारिता पुरस्कार मनिषा श्रेष्ठ, दुर्गा भण्डारी र कविता थापालाई प्रदान गरियो । क्रियाशील पत्रकारिता पुरस्कार प्रदीपराज वन्त, विनोद शाही र शेखर अधिकारी दिइयो भने सशक्त लेखन पत्रकारिता पुरस्कार मोतिराम तिमिल्सना, रिषव गौतम, गणेश लम्साल र प्रकाशकुमार खतिवडालाई दिइएको छ। यस्तै युवा सशक्तिकरण पत्रकारिता पुरस्कार पाउनेहरुमा लेखनाथ न्यौपाने, श्यामसुन्दर यादव, भुवन शर्मा, हेमन्तकुमार पौडेल र उपेन्द्रराज केसी रहेका छन ।
