बुटवल,असोज १० । त्रिवि शिक्षण अस्पतालका डाक्टर गोविन्द केसीले नवौंपटक अनसन बस्नुभएको छ । चिकित्सा क्षेत्रको सुधारको माग गर्दै विगतमा ८ पटकसम्म अनसन बस्नुभएका केसीले सरकारलाई दिएको अल्टिमेटमको समयमा पनि आफ्ना माग पूरा नभएको भन्दै सोमवारबाट फेरी अनसन शुरु गर्नुभएको हो । शिक्षण अस्पताल महाराजगञ्जमा आयोजित पत्रकार सम्मेलनमा डा. केसीले चिकित्सा शिक्षा ऐन संसदको जारी अधिवेशनबाटै पारित गर्न, अख्तियार प्रमुख लोकमानसिंह कार्की र सदस्य राजनारायण पाठकविरुद्ध महाअभियोग लगाउन र माथेमा आयोगको सिफारिस बमोजिम मेडिकल शिक्षा शुल्क लागू गर्न माग गर्नभएको छ । सुधारको माग गर्दै केसीले २०६९ सालदेखि विभिन्न मितिमा अनसन शुरु गर्नुभएको हो ।
सत्याग्रहका मागहरु
१) सरकार समक्ष हामीले पेश गरेका सुझावअनुरुप संशोधन गरी चिकित्सा शिक्षा ऐन संसदको यही अधिवेशनबाट तुरुन्त पारित गरियोस् ।
२) अदुअआ प्रमुख आयुक्त लोकमान सिंह कार्की र आयुक्त राजनारायण पाठकमाथि तत्काल महाभियोगको प्रक्रिया अघि बढाइयोस् ।
३) मेडिकल शिक्षाको शुल्क माथेमा कार्यदलले निर्धारित गरे बमोजिम तथा पछिल्लो सम्झौताबमोजिम कायम गर्दै पछिल्लो चोटि निजी मेडिकल कलेजका प्रतिनिधिहरुद्वारा बनाइएको कथित समितिको निर्णय खारेज गरियोस् ।
४) अघिल्लो पल्ट भएको सम्झौताका बाँकी बुँदा तत्काल कार्यान्वयन गरियोस्
आइओएममा तत्काल वरिष्ठताका आधारमा डिन नियुक्ति गरियोस्
चिकित्सा शिक्षा ऐनको मर्मविपरीत संसदमा विचाराधीन प्रक्रिया फिर्ता गरियोस्
आइओएमका भ्रष्ट पूर्व पदाधिकारीमाथि तत्काल छानविन र कारवाही अघि बढाइयोस् ।
