बुटवल, असोज १४ ।भूकम्पबाट क्षति भएका घर पुनर्निर्माणका लागि असोज १३ गतेसम्ममा ४ लाख ६ हजार ३ सय ९९ घरधनीको बैंक खातामा पहिलो किस्ताको ५० हजार रुपैयाँ जम्मा भइसकेको पुननिर्माण प्राधिकरणले जनाएको छ । अनुदान रकम लिन विभिन्न जिल्लाहरुका बैंकहरुमा भूकम्प पीडित घरधनीहरुको भीड लाग्ने गरेको जानकारी प्राप्त भएकोप्रति प्राधिकरणको ध्यानाकर्षण भएको भन्दै प्राधिकरणले बैंकमा रहेको रकम आवश्यकता अनुसार घर बनाउने समयमा निर्माण सामग्रीहरु खरिदका लागि निकाल्न सकिने र हतारमा अनुदान रकम ननिकाल्न र घर पुनर्निर्माणको तयारी गरेर घर निर्माण गर्ने समयमा मात्र रकम निकाल्न राष्ट्रिय पुननिर्माण प्राधिकरण सम्बन्धित सबैलाई आग्रह समेत गरेको छ ।
घर पुनर्निर्माणका लागि प्राप्त अनुदान रकम अन्य क्षेत्रमा प्रयोग गरे कानूनी कारवाही हुने, दोस्रो र तेस्रो किस्ताको अनुदान रकम समेत प्राप्त नहुने हुँदा अनुदान रकम घर पुनर्निर्माणमा बाहेक अन्यमा खर्च नगर्न तथा अनुदान सम्झौताका बेला गरिएको १५ बुँदे सम्झौताको परिपालन गर्न पनि राष्ट्रिय पुनर्निर्माण प्राधिकरणले अनुरोध गरेको छ ।
