बुटवल,असोज १६ । प्रधानमन्त्री पुष्पकमल दाहालले महिला मुक्ति नै मानव मुक्तिको पूर्वशर्त भएको बताउँदै महिला हिंसा अन्त्यका लागि जोडदिनुभएको छ ।
आइतबार सर्वोच्च अदालतद्वारा आयोजित महिला विरुद्धको हिंसा र न्यायमा पहूँच विषयक कार्यक्रममा प्रधानमन्त्री दाहालले महिला हिंसा विरुद्धको कार्यक्रम औपचारिकतामा सीमित नराखी दुरदराजका महिलाहरुको पहूँचसम्म लैजान जरुरी भएको पनि उल्लेख गर्नुभयो ।
आइतवार नै नेपाली सेनाको मूख्यालय जङ्गी अड्डाको निरीक्षण गर्नुभएका प्रधानमन्त्री दाहालले विश्वमा शान्ति स्थापनाका लागि नेपाली सेनाको उच्च योगदान रहेको बताउनु भयो ।
शान्तिको महत्व युद्धमा प्रत्यक्ष सहभागी भएर लडेकोले नै बढी बुझेको हुन्छ भन्दै प्रधानमन्त्रीले बाहिरबाट हेर्नेले युद्ध र शान्तिको अनुभूति गर्न सक्छन् । तर, आफै युद्धमा सहभागी भएको व्यक्तिले शान्तिको महत्व अरुको भन्दा बढी बुझेको हुन्छ भन्नुभयो ।
कार्यक्रममा प्रधानसेनापति रबिन्द्र क्षेत्रीले नेपाली सेनाले राष्ट्रिय सुरक्षा, राष्ट्रिय गौरवका आयोजना, विश्व शान्तिका लागि खेलेको भूमिका र आगामी रणनीतिबारे जानकारी गराउनु भएको थियो ।
