सधिन्खर्क, १७ असोज । बढ्दो सवारी दुर्घटना र यसबाट हुने धनजनको क्षति न्यूनिकरण गर्न शहरदेखि गाउँसम्म जनचेतना जागृत गर्ने कार्यक्रम संचालन गर्नुपर्ने सन्धिखर्कमा आयोजित एक कार्यक्रमका सहभागिहरुले बताएका छन ।
सुरक्षित यात्रा नेपालको आयोजनामा अर्घाखाँचीमा सम्पन्न सुरक्षित यात्रा हाम्रो अधिकार दुर्घटना न्यूनिकरण हामी सबैको साझा सरोकार बिषयक अन्तरक्रिया कार्यक्रममा बोल्ने बक्ताहरुले सवारी दुर्घटनाका कारणहरुबारे आम जनतालाई जानकारी गराउनु पर्ने धारणा ब्यक्त गरेका थिए ।
अर्घाखाँची जिल्लामा क्रियाशिल संघसंस्था, राजनैतिक दल, प्रहरी प्रशासन, बिद्यार्थी संगठन, पत्रकार लगाएत सरोकारवालाहरुको सहभागिता रहेको सो कार्यक्रमलाई सम्बोधन गर्दै लुम्बिनी अन्चल प्रहरी कार्यालय भैरहवाका बरिष्ठ प्रहरी उपरिक्षक शेरबहादुर बस्नेतले सडक दुर्घटना न्यूनिकरणका लागि आम जनसमुदायको भुमिका महत्वपुर्ण हुने बताउनु भयो ।
सवारी चालकको लापरवाही, यान्त्रिक गडबडी, यात्रुको चाप, सडकको दुरावस्था लगाएतका बिभिन्न कारणबाट सडक दुर्घटनामा बृद्धि भएको उल्लेख गर्दै एसएसपि बस्नेतले सडक दुर्घटनाबाट हुने धनजनको क्षति न्यूनिकरण गर्न सरोकारवाला सबैले कानुनको पालना गर्नु पर्ने बताउनु भयो ।
पश्चिम क्षेत्रिय ट्राफिक प्रहरी कार्यालय बुटवलका प्रहरी उपरिक्षक प्रकाश अधिकारीले आम जनतामा चेतना जागृत नभएसम्म दुर्घटना कम नहुने चर्चा गर्दै यसका लागि आवश्यक सहयोग गर्न सबैलाई आग्रह गर्नु भयो ।
सुरक्षित यात्रा नेपालका अध्यक्ष कृष्णप्रसाद बेलबासेको अध्यक्षतामा सम्पन्न सो कार्यक्रममा स्थानिय बिकास अधिकारी लक्ष्मी पाण्डे, प्रहरी उपरिक्षक नवरत्न पौडेल, नेपाली काँगे्रसका पुर्व सभापति कमल भुसाल, एमालेका सचिव रामबहादुर चौहान, पत्रकार महासंघका अध्यक्ष शोभाखर पन्थी, पश्चिमान्चल यातायात ब्यबसायी समितिका अध्यक्ष तथा सुरक्षित यात्रा नेपालका सल्लाहकार लोकराज पोखरेल, कानुनी सल्लाहकार कृष्ण पोखरेल, मजदुर संघका अध्यक्ष आत्मसिंह घर्तिमगर, पाणिनी बहुमुखी क्याम्पसका प्रमुख ज्ञानबहादुर क्षेत्री, माओबादी केन्द्रका तोजबहादुर रायमाझी लगाएतले सवारी दुर्घटनाका कारण र न्यूनिकरणका उपायका बारेमा चर्चा गरेका थिए ।
जिल्ला ट्राफिक प्रहरी कार्यालय र पाणिनी बहुमुखी क्याम्पसको समन्वय र सहयोगमा सम्पन्न भएको सो कार्यक्रममा सुरक्षित यात्रा बिद्यार्थी सन्जालका सचिव मेलीना सिंह ठकुरीको संचालन र सदस्य बिष्णु पन्थीको स्वागत रहेको थियो ।
अर्घाखाँचीमा बिगत दुई महिनामा ४ वटा सवारी दुर्घटना भएका र १४ जनाको मृत्यू भएको प्रहरीले जनाएको छ ।
