काठमाडौ । असोज २१ ।सांसदहरूले राजनीतिक स्थीरता सहित राष्ट्रिय दलको मान्यता पाउन निर्वाचनमा थ्रेस होल्डको ब्यवस्था गर्नुपर्ने प्रस्ताव सहित राजनीतिक दल सम्बन्धी विधेयकमा संशोधन प्रस्ताव दर्ता गरेका छन । नेपाली कांग्रेसले त ३ प्रतिशत थ्रेस होल्ड हुनुपर्ने निर्णय गर्दै सांसदहरु मार्फत संशोधन प्रस्ताव दर्ता गरेको छ । काग्रेसको संसदीय कार्यसमितिको शुक्रबार बसेको बैठकले तीन प्रतिशत थ्रेसहोल्ड राख्न दलको तर्फबाट संशोधन प्रस्ताव दर्ता गर्ने निर्णय गरेको हो ।
एमालेका सांसदहरुले ५ प्रतिशत थ्रेस होल्डको प्रस्ताव गरेका छन । नेकपा माओवादी केन्द्रका सासंदहरुले भने २ प्रतिशत थ्रेस होल्डका लागि संशोधन प्रस्ताव दर्ता गरेका छन । चुनावमा एक सिट पनि प्रत्यक्ष नजितेमा त्यसलाई गणना गर्न हुने र समानुपातिक मतलाई मात्रै आधार मानेर राष्ट्रिय पार्टी नहुने सासंदहरुको प्रस्ताव छ ।
उनीहरुले राष्ट्रिय मान्यता प्राप्त दललाई सरकारी बजेटबाट अनुदानको ब्यवस्था गर्नुपर्ने भन्दै चन्दा, लेवी वा कुनै पनि दान दातव्य दलहरुले लिन नपाउने ब्यवस्था गर्नुपर्ने प्रस्ताव समेत गरेका छन ।
दल दर्ता गर्दा कम्तिमा दश हजारको हस्ताक्षर अनिवार्य गर्नुपर्ने समेत ठुला दलका सांसदको प्रस्ताव छ । तर साना दलहरु भने त्यसको विपक्षमा छन ।
असोज १८ गते सरकारका तर्फबाट उपप्रधानमन्त्री एवम् गृहमन्त्री विमलेन्द्र निधिले संसदमा प्रस्तुत गरेको राजनीतिक दल, निर्वाचन आयोग र मतदाता नामावली गरी ३ वटा संशोधन विधेयक माथि संशोधन प्रस्ताव दर्ता गर्ने अन्तिम समयमा तीन दर्जनभन्दा बढी संशोधन प्रस्ताव दर्ता भएका हुन ।
