काठमाडौ । कार्तिक ४ । अख्तियार दुरूपयोग अनुसन्धान आयोगका प्रमुख आयुक्त लोकमानसिंह कार्कीविरूद्ध दर्ता भएको महाअभियोग प्रस्तावमाथि व्यवस्थापिका संसदमा छलफल प्रकृया सुरु भएपछि अव कार्कीले के गर्लान भन्ने चासो बढेको छ । अख्तियार प्रमुख कार्कीविरुद्ध बुधवार साँझ संसद सचिवालयमा महाअभियोग प्रस्ताव दर्ता भएको थियो ।
सत्तारुढ नेकपा माओवादी केन्द्र र नेकपा एमालेका १ सय ५७ जना सांसदको लिखित हस्ताक्षरसहित बुधवार साँझ महाअभियोग प्रस्ताव दर्ता गरेका थिए । तर ढिला दर्ता भएपनि समय भने पौने पाँच बजेको राखिएको श्रोतले बताएको छ । कार्की बुधवार नै क्यानडा बाट फर्कनुभएको हो ।
कार्कीविरुद्धको महाअभियोगमाथि बिहिवार संसदले छलफलको मिति र समय निर्धारण गर्ने संसदको कार्यसूची पनि बुधवार राती नै तयार गरिएको थियो । त्यसपछि कार्कीविरुद्ध महाअभियोग प्रस्ताव दर्ता भएको बारे सभामुख ओनसरी घर्तीले राति नै राष्ट्रपति विद्यादेवी भण्डारी र प्रधानमन्त्री पुष्पकमल दाहाललाई जानकारी गराउनुभएको थियो ।
नेकपा माओवादी केन्द्रका सांसद महेन्द्रबहादुर शाही प्रस्तावक रहनुभएको महाअभियोगको प्रस्तावमा एमाले वरिष्ठ नेता झलनाथ खनाल, नेता माधव नेपाल, पूर्वसभामुख सुवासचन्द्र नेम्वाङ र ऊर्जामन्त्रीसमेत रहनुभएका माओवादी नेता जनार्दन शर्माको समेत हस्ताक्षर छ । माओवादीका ५० जना सांसदसहित एक सय ५७ जनाको हस्ताक्षर रहेको संसद सचिवालयले जनाएको छ ।
योग्यता, क्षमता, आचरणलगायतका विषयमा व्यापक विरोधका बाबजुद अख्तियार प्रमुख बन्न सफल हुनुभएका कार्कीविरूद्ध संविधान र कानुनको उल्लंघन गरेको, कार्यक्षेत्रको अभाव वा खराब आचरण भएको तथा इमानदारीपूर्वक आफ्नो पदीय कर्तव्य पालना नगरेको आरोप लगाइएको छ ।
सविधान अनुसार आचारसंहितको गम्भीर उल्लंघन गरेको कारणले आफ्नो पदीय जिम्मेवारी पूरा गर्न नसकेको आधारमा एक चौथाइ सासंदको सिफारिसमा महाअभियोग प्रस्ताव दर्ता गर्न सकिन्छ ।
संविधानको धारा १ सय १ बमोजिम संसदले बुधवार नै ११ सदस्यीय महाअभियोग सिफारिस समिति गठन गरेको थियो ।
संसदमा महाअभियोग दर्ता भएसँगै प्रमुख आयुक्त कार्की स्वतः पदबाट निलम्बित हुनुभएको छ । उहाँ कार्यालय नगै निवासकै रहनुभएको र राजिनामा दिने की महाअभियोगको सामना गर्ने भन्ने सोचमा रहनुभएको बताइएको छ ।
यसैबीच, अख्तियार दुरुपयोग अनुसन्धान आयोगको निमित्त प्रमुखको जिम्मेवारी आयुक्त दिप बस्न्यातलाई दिइएको छ । आयोगको आज बसेको बोर्ड बैठकले वरिष्ठता आधारमा बस्न्यातलाई निमित्त प्रमुखको जिम्मेवारी दिएको प्रवक्ता गणेशराज कार्कीले जानकारी दिनुभयो ।
