बुटवल । कार्तिक ५ । नेपाली कांग्रेस केन्द्रीय समितिको बैठकमा सदस्यहरुले लोकमानसिंह कार्की बिरुद्धको महाअभियोग प्रस्ताव अव पार्टीको रणनीतिबारे छलफल गर्दै पार्टीले निर्णायक भुमिका खेल्नुपर्ने बताएका छन ।
विहिवारदेखि शुरु भएको बैठकको दोस्रो दिनको बैठकमा केही सदस्यहरुले कानून र विधि विपरित हिडेका कार्की बिरुद्धको महाअभियोग प्रस्तावमा उभिनुपर्ने बताएका छन ।
तर बैठकमा नेता शेखर कोइरालाले भने देशमा बामपन्थी ध्रुविकरण बढाउने खेल भैरहेको भन्दै लोकमानसिंह कार्की विरुद्धको महाअभियोग प्रस्तावमा पार्टीले हतारमा निर्णय गर्न नहुने धारणा राख्नुभएको एक केन्द्रीय सदस्यले बताएका छन ।
पार्टी कार्यालय सानेपामा बसेको बैठकमा संसदमा पेस भएको महाअभियोग प्रस्तावबारे छलफल भइरहेको छ । हिजोदेखि सुरु भएको बैठकमा केन्द्रीय सदस्यहरुले आ-आफ्नो धारणा राखिरहेका छन् ।
बिहिवारको बैठकमा सभापति शेरबहादुर देउवाले अख्तियार प्रमुख लोकमानसिंह कार्कीका गतिविधिलाई तत्कालिन राजा ज्ञानेन्द्र शाहको प्रत्यक्ष शासनकालको शाही आयोगका गतिविधि जस्तै भएको बताउनुभएको थियो । उहाँले लोकमान सिह कार्कीले कैयौ गल्ती गरेकाले अब कसैले बचाउन नसक्ने बताउनुभएको थियो ।
