२०७३ कार्तिक १० । प्रमुख तीन दलका शीर्ष नेताहरुले राष्ट्रिय महत्वका विषयमा सहमतिकासाथ अघि बढ्ने समझदारी गरेका छन् ।
नेकपा माओवादी केन्द्रका अध्यक्ष पुष्पकमल दाहाल प्रधानमन्त्री बनेपछि बुधवार पहिलो पटक बसेको तीन दलका शिर्ष नेताहरुको बैठकले अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्कीविरुद्ध संसदमा अघि बढेको महाअभियोग प्रस्ताव, सविधान संशोधन र कार्यान्वयन तथा आगामी निर्वाचनहरुका विषयमा सहमतिका साथ अघि बढ्ने समझदारी गरेको हो ।
बैठकमा व्यवस्थापिका–संसदमा पेश भएको महाअभियोग प्रस्ताव, निर्वाचन, संविधान संशोधन, संविधान संशोधन लगायतका विषयमा छलफल भएको थियो ।
बैठकमा शीर्ष नेताहरुबीच शीर्ष तहको सम्वाद जारी राख्दै संविधान संशोधन, संविधान कार्यान्वयन, महाअभियोग लगायतका विषयमा सहमतिका आधारमा अन्तिम टुङ्गोमा पुग्ने गरी सकारात्मक छलफल भएको शीर्ष नेताहरुले जानकारी दिनुभएको छ ।
दाहाल प्रधानमन्त्री भएपछि पहिलो पटक बालुवाटार जानुभएका एमाले अध्यक्ष केपी ओलीले समसामयिक राजनीतिक विषयमा छलफल भएको सहमति खोज्न थप छलफल गरिने बताउनुभयो काग्रेस सभापति शेरबहादुर देउवाले पनि एजेण्डामा छलफल सकारात्मक भएको बताउनुभयो ।
संसदमा शुरु भएको अख्तियार प्रमुख कार्कीविरुद्धको महाअभियोग प्रस्तावमाथिको छलफलका क्रममा सांसदहरुले राष्ट्रिय महत्वका विषयमा प्रमुख दलहरु मिलेर अघि बढ्नुपर्नेमा जोडदिएका थिए । त्यसको भोलीपल्टै बसेको तीनदलको बैठकलाई महत्वका साथ हेरिएको छ । तस्वीर, प्रधानमन्त्री कार्यालय
