काठमाडौं । मंसिर १ ।रासस- आन्तरिक राजस्व विभागले विभिन्न विधामा सर्वाधिक कर तिर्ने १५ करदातालाई पुरस्कृत गरेको छ। पुरस्कृत हुनेहरुमा संस्थागत र व्यक्तिगत रुपमा बढी तिर्नेहरु छन्। उनीहरुलाई बुधवार पाँचौं राष्ट्रिय कर दिवसको अवसरमा पुरस्कार प्रदान गरिएको हो।
आन्तरिक राजस्व विभागले विभिन्न विधामा सर्वाधिक कर तिर्ने १५ करदातालाई पुरस्कृत गरेको छ। पुरस्कृत हुनेहरुमा संस्थागत र व्यक्तिगत रुपमा बढी तिर्नेहरु छन्। उनीहरुलाई बुधवार पाँचौं राष्ट्रिय कर दिवसको अवसरमा पुरस्कार प्रदान गरिएको हो।
यसरी पुरस्कृत हुनेहरुमा उत्पादन उद्योग तर्फबाट सूर्य नेपाल प्रालि, निर्यात कम्पनीका तर्फबाट डाबर नेपाल, विशेष उद्योगतर्फ युनिलिभर नेपाल र पशुपंक्षीजन्य उद्योगका तर्फबाट ओम सावर फिड इन्डष्ट्रिज पुुरस्कृत भएका छन्।
त्यस्तै बढी कर तिर्ने सहकारीमध्येबाट राष्ट्रिय सहकारी बैंक लिमिटेड, लघुवित्त कम्पनीका तर्फबाट छिमेक लघुवित्त कम्पनी, बैंक वित्तीय संस्थाका तर्फबाट नबिल बैंक, बीमा व्यवसायबाट लाइफ इन्सुरेन्स कर्पाेरेसन, विप्रेषण कम्पनीका तर्फबाट आएमई लिमिटेड पुरस्कृत भए।
पर्यटन व्यवसायीतर्फ तारा गाउँ रिजेन्सी होटल, व्यापार व्यवसायका तर्फबाट सिप्रदी ट्रेडिङ लिमिटेड, साना करदातामध्येबाट सिवेक अस्पताल प्रालि, व्यक्तिगतमध्येबाट सिद्धार्थशम्शेर जबरा छन्। कर कार्यालयमा दर्ता भएपछि हालसम्म सबैभन्दा कर तिर्ने नेपाल दूरसञ्चार कम्पनी पनि पुरस्कृत भएको छ।
कर दिवसको अवसरमा उपप्रधानमन्त्री एवम् अर्थमन्त्री कृष्णबहादुर महराले सरकारले प्रदान गर्ने सामाजिक सुरक्षा सेवा वृद्धि गर्न करको दायरा र परिमाण बढाउनुपर्नेमा जोड दिएका छन्। कर दिवसका अवसरमा आन्तरिक राजस्व विभागले बुधवार काठमाण्डौमा आयोजना गरेको कार्यक्रममा उपप्रधानमन्त्री महराले सबैले कर तिरे राजस्व वृद्धि हुने र राजस्व वृद्धि भएपछि त्यसको प्रतिफल जनताले पाउने बताए।
राजस्व सचिव राजन खनालले सरकारले जनतासँग कर लिएपछि सेवा र सुविधा दिनुपर्छ भन्दै यसबाट मुलुकको उन्नति हुने उल्लेख गरे। उनले आमजनतासँग लिएको कर तिनकै हितका लागि विकास कार्यमा उपयोग भए मात्र त्यसले सार्थकता पाउने धारणा व्यक्त गरे।
विभागका महानिर्देशक चूडामणि शर्माले राज्यको कर प्रणालीसम्बन्धी नीतिमा करका दरलाई सङ्ख्यात्मक र रकमका हिसाबले घटाउने र दायरा विस्तार गर्दै लैजाने योजना रहेको बताए।
नेपाल उद्योग वाणिज्य महासङ्घका अध्यक्ष पशुपति मुरारकाले कर प्रशासन र करदाताबीच सुमधुर सम्बन्ध हुनुपर्ने बताउँदै करसम्बन्धी कानुन परिमार्जनको आवश्यकता आँैल्याए। उत्कृष्ट करदाता सिप्रदी ट्रेडिङका तर्फबाट शम्भु दाहालले सबै जनताले राष्ट्रप्रति आफ्नो दायित्व निर्वाह गर्नुपर्ने धारणा राखे।
