काठमाडौ । मंसीर ६ । एउटै पार्टीमा दुई जनालाई अध्यक्ष बनाउँदै पुर्व पन्चहरुका दुईवटा दलबीच एकता भएको छ । लामो कसरत र भागबण्डाको रस्साकस्सीपछि सत्तामा रहेको राष्ट्रिय प्रजातन्त्र पार्टी र विपक्षमा रहेको राष्ट्रिय प्रजातन्त्र पार्टी नेपालबीच सोमवार औपचारिक समारोह मार्फत एकता भएको हो ।
कहि नभएको जात्रा हाँडिगाँउमा भने झै एकतापछि पार्टीको राष्ट्रिय अध्यक्ष पशुपति शमसेर जबरा र पार्टी अध्यक्ष तथा संसदीय दलको नेता कमल थापा गरि एउटै पार्टीमा दुइ जना अध्यक्ष भएका छन ।
दुइ पार्टीबीचको एकतापछि ३८ जना सांसद सहित राप्रपा ब्यवस्थापिका संसदको चौथो दल बनेको छ। एकीकृत पार्टीको महाधिवेशन आगामी माघभित्र सम्पन्न गर्ने तय भएको छ ।
एकता सभामा पार्टी अध्यक्ष कमल थापाले केही बर्षभित्रै रापप्रालाई देशको सवैभन्दा ठुलो दल बनाउने घोषणा गर्नुभयो ।
मुलुकमा बाह्यशक्तिको हस्तक्षेप बढेको भन्दै उहाँले सविधानको कार्यान्वयन र तीनवटै तहको चुनाव आगामी २०७३ चैतसम्ममा गर्नु अहिलेको मुख्य चुनौती रहेको बताउनुभयो । उहाँले स्थानीय चुनावको मिति छिटो घोषणा गर्न पनि सरकारसँग माग गर्नुभयो ।
यस्तै राष्ट्रिय अध्यक्ष पशुपति शम्शेर जवराले देशको विग्रदो राजनीतिक अवस्था र आर्थिक अस्थिरतालाई माथि उकास्न पार्टी एकता भएको बताउनुभयो ।
उहाँले राजनीतिमा दुइ र दुइ जोडेर आठ समेत हुने भन्दै उहाँले विगतका कमजोरी अन्त्य गर्नुपर्ने बताउनुभयो ।
अर्का नेता लोकेन्द्रबहादुर चन्दले चुनावमा धाधली हुने प्रजातन्त्र सच्चा प्रजातन्त्र हुन नसक्ने भन्दै उहाँले चुनावका बेला राज्यका सवै संयन्त्र निर्वाचन आयोगको मातहतमा राख्नुपर्ने बताउनुभयो ।
एकअर्कालाई सघाउँदा खुसी भइन्छ तर एकअर्कालाई छिड्के हान्दा दुख पाइन्छ भन्दै नेता चन्दले कुर्सीका लागि जेपनि गर्ने प्रवृति र लम्पसारबाद बढेको उहाँको भनाई थियो ।
अर्का नेता विश्ववन्धु थापाले सबै मिलेर प्रजातान्त्रिक रुपमा पार्टीलाई बलियो बनाउन सुझाव दिनुभयो ।
नेता प्रकाशचन्द्र लोहनीले प्रजातान्त्रिक मुल्यमान्यतालाई आत्मसात गरेर अघि बढ्नुपर्नेमा जोडदिनुभयो । पुराना संस्कृति र परम्परासहितको नयाँपन अंगालेर पार्टीलाई अघि बढाउनुपर्ने र नेताले कार्यकर्ताको इज्यत गर्नुपर्ने उहाँको भनाई थियो ।
