काठमाडौं, मंसिर १२ । चिकित्सा शिक्षामा सुधारको माग गर्दै आमरण अनसनमा बस्नुभएका डाक्टर गोविन्द केसी पक्ष र सरकारी टोलीबीचको वार्ता विना निष्कर्ष टुगिएको छ ।
अनसनको १५औं दिन आज शिक्षा सचिव शान्तबहादुर श्रेष्ठको नेतृत्वमा गठन भएको सरकारी वार्ता टोली र केसी पक्षबीच आइतवार शिक्षा मन्त्रालयमा पहिलो चरणको वार्ता सुरु भएको थियो । तर कुनै सहमति भने हुन सकेन । वार्ता सोमवार पनि हुने बताइएको छ ।
डाक्टर केसी अनसन बसेको दुई सातापछि सरकारले हिजो वार्ता टोली गठन गरेको थियो । त्रिवि चिकित्सा शास्त्र अध्ययन संस्थानमा वरिष्ठताका आधारमा डिन नियुक्ति हुनुपर्ने, डिन नियुक्तिमा चलखेल गर्ने उपकुलपति खनियाको बर्खास्ती लगायतका १० सूत्रीय माग राख्दै डाक्टर केसी अनसन बस्नुभएको हो ।
यसैबीच, रेजिडेन्ट डक्टर्स एसोसिएसन, एमबीबीएस अध्ययनरत विद्यार्थी र सोलिडारिटी फर डाक्टर केसी अलायन्सले आइतवार कीर्तिपुरस्थित त्रिवि उपकुलपति तीर्थ खनियाको कार्यालय घेराउ गरेका थिए ।
