काठमाडौ । पुस २२ । राजनीतिक प्रतिशोधका कारण हटाउने निर्णय गरेको सरकारले राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीलाई दोस्रो पटक स्पष्टीकरण सोधेको छ । ज्ञवालीलाइ हटाउने मन्त्रिपरिषद्को बिहिवारको निर्णय अनुसार थप प्रकृया पुर्याउन सीईओ ज्ञवालीलाई शुक्रवार स्पष्टीकरण पत्र पठाइएको हो ।
सरकारले पठाएको पत्रमा सम्बन्धित निकायलाई समन्वय गर्न नसकेको, पुनर्वासको व्यवस्था मिलाउन नसकेको र पीडितलाई समयमै अनुदान दिन नसकेको भन्दै तपाईलाई किन नहटाउने प्रश्न गरिएको छ । बिहिवारको मन्त्रिपरिषद बैठकले सीईओ ज्ञवालीलाई हटाउने प्रक्रिया पूरा गर्न प्रधानमन्त्रीलाई जिम्मा दिएको थियो ।
गत हप्ता सोधिएको स्पष्टीकरणमा हटाउने प्रसंग उल्लेख भएको थिएन । दोश्रो पत्र पाएपछि ज्ञवालीले आफुले स्पष्ट जवाफ दिएको र दोश्रो पत्रको पनि जवाफ दिने बताउनुभयो ।
गत बुधबार ज्ञवालीले बुझाउनुभएको स्पष्टीकरण चित्त नबुझेको भन्दै सरकारले ज्ञवालीसँग २४ घण्टाभित्र बुझाउनेगरी पुनः स्पष्टीकरण माग्ने निर्णय गरेको थियो ।
