काठमाडौ । माघ २३ । प्रधानमन्त्री र मन्त्रीहरु कमिसन र भागबण्डामा लागेकाले देशको विकास हुन नसकेको माओवादी केन्द्रकै नेताहरुले आरोप लगाएका छन । संसदको आइतवारको बैठकमा विकास समितिको प्रतिवेदनमाथिको छलफलमा भाग लिदै माओवादी केन्द्रकका सांसद रामनारायण विडारीले प्रधामन्त्री र मन्त्रीहरु कमिसनमा चुर्लुम्म डुब्ने गरेको र विकास लथालिगं भएको आरोप लगाउनुभयो । विदेशी इशारामा चल्नेहरुले ठेक्का र कमिसन पनि विदेशीलाई दिने गरेको भन्दै उहाँले यही गतिले देशले कहिल्लै फड्को मार्न नसक्ने बताउनुभयो । प्रतिवेदन पेश गर्दे विकास समितिका सभापति रविन्द्र अधिकारीले विकासका लागि सरकार गम्भीर नभएको र बर्षौ समय तोकेर पनि काम फत्ते नहुने गरेको भन्दै समितिका निर्देशन सरकारले कार्यान्वयन नगरेको बताउनुभयो ।
नेमकिपाका सांसद प्रेम सुवालले प्रजातन्त्र बोल्न र दल खोल्न मात्रै भएको तर विकासका काम नभएको टिप्पणी गर्नुभयो । बैठकमा सांसद विकास लम्साल, रामेश्वर फुयाल र भरत थापा लगायतले राष्ट्रिय गौरवका योजनाहरु वर्षौंदेखि अलपत्र परेका, प्रशासन फितलो भएको र अनुगमन देखावटी मात्रै भएकोले विकासका काम कागजमै हुन नसकेको बताएका थिए ।
