काठमाडौ । चैत ३ । नेकपा -एमाले) ले सञ्चालन गरेको मेची-महाकाली राष्ट्रिय अभियान अन्तर्गत बिहिवारको सभा कैलाली र महेन्द्र नगरमा भएको छ । विशाल जनसमुदायका बीचमा आयोजित उक्त सभाहरुमा थारु समुदायका विभिन्न झाँकीहरु प्रस्तुत गरिएको थियो ।
कार्यक्रमलाई सम्बोधन गर्दै एमाले अध्यक्ष तथा पूर्वप्रधानमन्त्री केपी शर्मा ओलीले भौगोलिक अखण्डता, स्वतन्त्रता र स्वाभिमानका बारेमा एमाले कसैसग सम्झौता नगर्ने स्पष्ट पार्नुभयो ।भाषा, भूगोल वा जातिका नाममा हुने कुनै पनि प्रकारका विखण्डनलाई हामी स्वीकार नगरिने बताउँदै उहाँले देशलाई अगाडि बढ्न नदिने तत्वहरुले जनतालाई एमालेका कार्यक्रममा आउन छेकबार लगाउने कोसिस गरेका तर, तिनीहरुका प्रयासलाई विफल पारेर जनताले एमालेप्रतिको आफ्नो समर्थन प्रकट गरेको बताउनुभयो ।
निर्वाचन र संविधान संशोधनको कुनै सम्बन्ध नभएको भन्दै ओलीले संशोधन पहाड र तराईलाई छुट्याउने षड्यन्त्रको सिलसिला भएकोले मिलेर बसेका समुदालाई विभाजित गर्ने षड्यन्त्रलाई सफल हुन नदिने पनि प्रष्ट पार्नुभयो ।
कार्यक्रममा एमाले उपाध्यक्ष वामदेव गौतमले हिन्दी भाषालाई सरकारी काममाजको भाषा बनाउने प्रस्तावलाई कुन चाहि नेपालीले स्वीकार गर्न सक्छ ? भन्दै सरकारले पहिलो चरणमा पहाड र तराई छुट्याउने, त्यसपछि सिंगो मधेसको एउटै प्रदेश बनाउने, अनि विशेष स्वायत्तता दिने र अन्तिममा अलग्गै राष्ट्र बनाएर अन्त कतै लिएर मिसाउने योजना बनाइएको आरोप लगाउँदै एमालेले यो सपना कदापि पूरा हुन नदिने बताउनुभयो ।
कार्यक्रममा केन्द्रीय सचिव भीम आचार्य , सदस्य तथा सांसद गरिमा शाह, बैकल्पिक सदस्य तथा सांसद प्रेमबहादुर आले र नारदमुनि रानाले पनि बोल्नुभएको थियो ।
पार्टीका उपाध्यक्ष तथा प्रदेश नम्बर ७ का संयोजक भीम रावलको अध्यक्षता र केन्द्रीय कमिटीका सदस्य महेश्वर पाठकको सञ्चालनमा आयोजित सभामा सहभागीहरुलाई प्रदेश नम्बर ७ का सहसंयोजक कर्णबहादुर थापाले स्वागत गर्नुभएको थियो ।
कार्यक्रममा पूर्वप्रमुख जिल्ला अधिकारी डिल्लीराज जोशी, माओवादी केन्द्रका केन्द्रीय सदस्य डम्बरबहादुर सिंहलगायत पार्टी प्रवेश गर्नेहरुलाई स्वागत गरिएको थियो ।
मेची-महाकाली राष्ट्रिय अभिायनको बिहिवार नै कञ्चनपुरको महेन्द्रनगरमा पनि सभा भएको छ ।
