काठमाडौ । चैत ८ । सर्वोच्च अदालतले प्रहरी महानिरीक्षक बढुवा भएका जयबहादुर चन्दको नियुक्तिलाई बदर गरेको छ । लामो विवाद र बहस भैरहेका बेला सर्वोच्चले मंगलवार महानिरिक्षक नियुक्ति मुद्धाको फैसला सुनाएको हो ।
प्रधानन्यायाधीश सुशीला कार्कीसहित न्यायाधीशहरु हरिकृष्ण कार्की, आनन्दमोहन भट्टराई, ईश्वरप्रसाद खतिवडा, र अनिलकुमार सिन्हा रहेको पूर्ण इजलासले उक्त टुगो लगाएको हो । सर्वोच्चले कार्यसम्पादन मूल्यांकन र ज्येष्ठताका आधारमा बढुवा गर्न निर्देशन दिदै चन्दको बढुवा रोकेको छ ।
सर्वोच्चको फैसलाले मर्यादाक्रममा पहिलो नम्बरमा रहेका डीआईजी नवराज सिलवाललाई प्रहरी महानिरीक्षक हुने बाटो खुला भएको छ ।
फागुन १ गते प्रहरी महानिरीक्षकमा पहिलो वरीयताका नवराज सिलवाल र दोस्रो वरीयताका प्रकाश अर्याललाई छाडेर तेस्रो नम्बरका जय बहादुर चन्दलाई सरकारले बढुवा गरेको थियो ।
प्रधानमन्त्री पुष्पकमल दाहाल र उपप्रधान एवं गृहमन्त्री विमलेन्द्र निधि पहिलो नम्बरका सिलवाललाई महानिरीक्षक बनाउने पक्षमा रहेका तर कांग्रेस सभापति शेरबहादुर देउवाले आफ्नै क्षेत्र सुदुरपश्चिमका चन्दलाई नियुक्त गर्न दबाब दिएको समाचार बाहिर आएको थियो। सरकारले चन्दको बढुवा गरे लगत्तै प्रधानन्यायाधीश कार्कीकै इजलासले महानिरीक्षक बढुवाको निर्णय कार्यान्वयन नगर्न अल्पकालीन अन्तरिम आदेश दिएको थियो ।
