काठमाडौ । चैत २९ । सरकारले व्यवस्थापिका संसद सचिवालयमा संविधान संशोधनको नयाँ प्रस्ताव दर्ता गरेको छ । मधेशी मोर्चाका माग सम्वोधन हुने र स्थानीय तहको निर्वाचनको सुनिश्चित समेत गर्न भन्दै सरकारले मंगलवार ११ बुँदे संविधान संशोधन प्रस्ताव दर्ता गरेको हो ।
नयाँ प्रस्तावमा सिमाकंन विवाद आयोगबाट टुगो लगाउने प्रस्ताव गरिएको छ ।
यसअघि मंगलवारको संसद बैठकमा सरकारले संसदमा मा विचाराधिन संविधान संशोधन प्रस्ताव फिर्ता लिएको थियो । कानूनमन्त्री अजयशंकर नायकले राख्नु भएको विचाराधिन संविधान संशोधन विधेयक फिर्ता लिने प्रस्ताव संसदको बैठकले सर्वसम्मत स्विकृत गरेको हो । प्रस्ताव फिर्ता मधेशी मोर्चालाई सहमतिमा ल्याउन र निर्वाचनको वातावरण सुनिश्चित गर्न लिएको उहाँले बताउनुभयो । तर सरकारको नयाँ प्रस्तावलाई मधेशी मोर्चाले फेरि अस्विकार गरेको छ । मधेशी मोर्चामा आवद्ध दलहरुले भने संशोधन प्रस्ताव फिर्ता लिए आफुहरुलाई मान्य नहुने चेतावनी दिएका छन् ।
स्थानीय तह निर्वाचनमा भाग लिने वातावरण बनाउनका लागि संसदमा विचाराधिन रहेकै सीमाङकन सहितको विधेयक पारित हुनुपर्ने मोर्चाको माग छ । संसदमा भएको विधेयक फिर्ता नगर्न माग गर्दै मधेशी मोर्चा आवद्ध सांसदले संसद बैठक वहिस्कार गरेका थिए ।
