बुटवल । बैशाख १ । विक्रम संम्वत् २ हजार ७४ साल, वैशाख १ गते । अर्थात् नयाँ वर्षको पहिलो दिन । नेपालीहरुले एक-आपसमा शुभकामना आदानप्रदान गरी नयाँ वर्ष मनाइरहेका छन् ।
नयाँ वर्षको पहिलो दिनलाई विगतका कमजोरी भुलेर नयाँ जोस र उमंगका साथ नयाँ कामको थालनी गर्ने शुभ-अवसरका रुपमा लिने गरिन्छ । नयाँ वर्षका अवसरमा राष्ट्रपति विद्यादेवी भण्डारीले शुभकामना सन्देश दिदै राजनीतिक परिवर्तनमार्फत प्राप्त ऐतिहासिक उपलब्धिसँगै देशमा आर्थिक–सामाजिक समृद्धितर्फको यात्रा अगाडि बढोस् भन्ने कामना गर्नुभएको छ ।
यस्तै उपराष्ट्रपति नन्दबहादुर पुनले २ हजार ७४ सालमा संविधान कार्यान्वयन र आर्थिक-सामाजिक रूपान्तरणसहितको समुन्नत र समृद्ध राष्ट्र निर्माणजस्तो मुलुकको साझा एजेन्डामा सबैको ध्यान जाओस् भन्दै शुभकामना दिनुभएको छ ।
यसैगरी, प्रधानमन्त्री पुष्पकमल दाहालले शुभकामना दिँदै ७४ सालले मुलुकलाई शान्ति र समृद्धिको दिशामा अग्रसर गरोस् भन्ने सन्देश दिनुभएको छ ।
यस्तै नेपाली कांग्रेसका सभापति शेरबहादुर देउवा, नेकपामा एमालेका अध्यक्ष केपी शर्मा ओली, पूर्व राजा ज्ञानेन्द्र शाहले पनि नयाँ वर्षको शुभकामना सन्देश दिनुभएको छ ।
