काठमाडौ । जेठ ५ । पहिलो चरणको मतगणना चलिरहदा मुख्य रुपमा चारवटा महानगरपालिकामा कडा प्रतिष्पर्धा चलिरहेको छ ।
सवैभन्दा चासो चितवनको भरतपुरमा छ । भरतपुरमा केही समय माओवादी केन्द्रकी रेणु दाहालले अग्रता लिए पनि अहिले एमालेका देवी ज्ञवाली अगाडी छन ।
काठमाडौ महानगरमा पनि झण्डै चार हजार मतले एमालेका विद्यासुन्दर शाक्य काँग्रेसका राजु जोशी भन्दा अगाडि छन । यस्तै पोखरामा पनि एमालेकै मानबहादुर जिसिको मत काग्रेसका रामजी कुँवरको भन्दा धेरै आइरहेको छ ।
अर्को महानगर ललितपुरमा भने काग्रेसका चिरीबाबु महर्जन एमालेका हरिकृष्ण ब्यन्जनकार भन्दा अगाडी छन । महानगरको मत गणना चलिरहेको छ ।
स्थानीय तहको पहिलो चरणको निर्वाचनमा नेकपा (एमाले)ले अहिलेसम्म ३३ नगरपालिका र ७२ गाउँपालिका गरी १०५ स्थानीय तहमा विजय हासिल गरेको छ । घोषित मत परिणामअनुसार निर्वाचन भएका ३४ जिल्लाका सदरमुकाम तथा प्रमुख शहरी क्षेत्रका नगरपालिकामा विजय हासिल गर्नुका साथै एमालेले विगतको विजयलाई निरन्तरता दिंदै अग्रता कायम गरेको छ ।
मतगणना भइरहेका चार महानगरपालिकामध्ये तीन महानगरपालिका काठमाडौं, भरतपुर र पोखरा–लेखनाथमा एमालेको अग्रता कायमै छ भने ललितपुर महानगरमा पनि नेपाली काँग्रेसका उम्मेदवारसँग एमालेले मतान्तर कम गर्दै अगाडि बढिरहेको छ ।
पछिल्लो मत परिणामअनुसार काभ्रेपलाञ्चोकको ऐतिहासिक शहर पनौतीको नगरप्रमुख र उपप्रमुखमा सूर्यध्वजाबाहक उम्मेदवारहरु भीम न्यौपाने र गीता बञ्जारा निर्वाचित हुनुभएको छ । विगतमा सधै नेपाली कांग्रेसले जित्दै आएका नवलपुरको गैडाकोट र काभ्रेको बनेपामा समेत यसपाली एमालेले ऐतिहासिक विजय हासिल गरेर कांग्रेसको गढ भत्काएको छ । साथै, दुई जना दलित समुदाय र दुई जना महिलालाई नगरप्रमुखमा निर्वाचित गराउन सफल भएको छ ।
