बुटवल ।जेठ २१। प्रधानमन्त्रीका एक्ला उम्मेदवार भएर पनि नेपाली कांग्रेसका सभापति शेरबहादुर देउवा प्रधानमन्त्रि निर्वाचित हुने समय अन्योलमा परेको छ ।
संसदीय प्रकृयाबाहिरबाट सुचना टाँसेर प्रधानमन्त्री निर्वाचनको काम अघि बढाइएको भन्दै र भरतपुरमा मतगणना जारी गर्नुपर्ने भन्दै एमालेले संसद अवरुद्ध गरेपछि प्रधानमन्त्री निर्वाचन प्रकृया अन्योलमा परेको हो ।
आइतवार बिहान ११ बजे तोकिएको निर्वाचन प्रकृया संसद चल्न नसक्ने अवस्था भएपछि सहमति खोज्न भन्दै ३ बजेसम्मका लागि स्थगित गरिएको छ ।
शनिवार भएको प्रधानमन्त्री पदको मनोनयमा देउवाको प्रस्तावकमा नेकपा माओवादी केन्द्रका अध्यक्ष पुष्पकमल दाहाल रहनुभएको थियो ।
समर्थकमा कांग्रेस वरिष्ठ नेता रामचन्द्र पौडेल, फोरम लोकतान्त्रिकका अध्यक्ष विजयकुमार गच्छदार, अखण्ड नेपाल पार्टीका कुमार खड्का, समाजवादी जनता पार्टीका अध्यक्ष प्रेमबहादुर सिंह र नेकपा संयुक्तका जयदेव जोशी रहनुभएको छ ।
