बुटवल । असार ४ । दोस्रो चरणको निर्वाचनका लागि प्रदेश नम्बर १, ५ र ७ का सवै स्थानिय तहमा उत्साहजनक र शान्तिपुर्ण रुफमा उम्मेद्धवारहरुको मनोनयन दर्ता भएको छ ।
तिनै प्रदेशका तीन सय ३४ स्थानीय तहको नेतृत्वका लागि राजनीतिक दल र स्वतन्त्र उम्मेद्वारले मनोनयन दर्ता गराएका हुन् । सामान्य घटना वाहेक सबै स्थानमा शान्तिपूर्ण रुपमा उत्साहका साथ उम्मेद्वारी दर्ता भएको निर्वाचन आयोगले जनाएको छ ।
उम्मेद्वारी मनोनयन दर्ता गर्न विभिन्न राजनीतिक दल र स्वतन्त्र उम्मेद्वारहरु तामझाम र वाजा गाजाका साथ निर्वाचन कार्यालय पुगेका थिए ।
असार १४ गते हुने दोस्रो चरणको निर्वाचन मार्फत एक महानगर, सात उपमहानगर, एक सय ११ नगरपालिका र दुई सय १५ गाउँपालिकाबाट १५ हजार ३८ प्रतिनिधि निर्वाचित हुनेछन् ।
चुनावका लागि ४ हजार ५ सय ८१ मतदान स्थलअन्तर्गत ८ हजार ३ सय ६४ मतदान केन्द्र रहने निर्वाचन आयोगले जनाएको छ । निर्वाचनमा सुरक्षाकर्मीबाहेक ६६ हजार नौ सय कर्मचारी खटिएका छन् ।
रुपन्देहीमा पनि शान्तिपूर्ण रुपमा स्थानीय तहको निर्वाचनको उम्मेदवारी मनोनयन भएको छ। जिल्लाका १६ वटै तहमा मनोनयन अन्तिम चरणमा पुगेको छ। आन्दोलनरत राजपाको अवरोध समेत भएन मनोनयनमा ।
जिल्लाको दक्षिण मर्चवार क्षेत्रमा राजपाका नेताहरुले नै स्वतन्त्रमा उम्मेदवारी दिएका छन् । समरीमाई गाउपालिकामा राजपाका नेताले प्यानल नै उम्मेवारी दिएका छन्।
बुटवल उपमहानगरपालिकामा बुटवलमा कांग्रेस र माओवादीको तालमेल छ। कांग्रेसबाट खेलराज पाण्डे, उपमेयरमा जगत पोख्रेलको उम्मेदवारी परेको छ ।
एमालेका तर्फबाट मेयरमा शिवराज सुवेदी र उपमेयरमा गोमा आचार्यले उम्मेदवारी दिनुभएको छ । बुटवलमा जनमुक्तिबाट जनक थापा मेयर, धनी आले उपमेयर तथा नेमकिपाबाट हरिसुन्दर बासीले मेयरमा उम्मेदवारी दिनुभएको छ। राप्रपाबाट मेयरमा जानुका पौडेल र उपमेयरमा रामबहादुर थापाले उम्मेदवारी दिनुभएको छ। नयाशक्तिले समर्थन गरेका स्वतन्त्र मेयरबाट होम वहादुर गलामी र उपमेयरमा पार्वती खड्काको उम्मेदवारी परेको छ। बुटवलमा देशभक्त जनतान्त्रिकबाट मेयरमा रामप्रसाद पोख्रेल, उपमेयरमा शान्ता मरासिनीको उम्मेदवारी छ।
रुपन्देहीको तिलोत्तमामा कांग्रेसबाट मेयरमा रामकृष्ण खाणले उम्मेदवारी दिनुभएको छ। उपमेयरमा जनमुक्तिकी गिता सारुले मनोनयन दिनुभएको छ।
यस्तै तिलोत्तमामा एमालेका बासुदेव घिमिरे, माओवादी केन्द्रबाट महादेव खनाल, नयाशक्ति र समाजबादीबाट ज्ञानप्रसाद भुर्तेल, जनमोर्चाबाट रुकबहादुर पराजुली, राप्रपाबाट लक्ष्मी पाठकले मेयरमा उम्मेदवारी दिनुभएको छ। त्यस्तै नेमकिपाबाट सर्सा विक र स्वतन्त्र दिनेश अर्यालले उम्मेदवारी दिनुभएको छ।
गुल्मी जिल्लामा रहेका २ नगरपालिका र १० गाउँपालिकाको लागि उम्मेदवारहरु मनोनयनका लागि तामझामका साथ निर्वाचन कार्यालयमा पुगेका थिए ।
जिल्लामा रहेका १२ वटै स्थानीय तहमा शान्तिपूर्ण रुपमा मनोनयन दर्ता भइरहेको मुख्य निर्वाचन अधिकृत मात्रिका मरासिनीले जानकारी दिए ।
उता स्थानीय चुनाव बहिस्कार गरेको विप्लव समूहले रोल्पाको थवाङमा भने उम्मेदवारी दर्ता गराएको छ ।
थवाङ गाउँपालिकाको अध्यक्षमा विप्लव नेतृत्वको नेकपाबाट भक्तबहादुर घर्तीले उम्मेदवारी दर्ता गराएका छन् । नेकपा निर्वाचन आयोगमा दल दर्ता नभएकाले घर्तीको स्वतन्त्र रुपमा उम्मेदवारी दर्ता भएको छ ।
