केशव भण्डारी –
बुटवल । असार ५ । राजनीति हो यहाँ जे पनि हुन्छ भन्ने नेपाली राजनीतिको चरित्र स्थानीय तहको दोश्रो चरण निर्वाचनको उम्मेदवारी मनोनयनमा पनि देखिएको छ । यहि असार १४ गते हुने स्थानीय तहको निर्वाचनका लागि प्रमुख राजनीतिक दलहरुबीच सिद्दान्त भन्दा स्वार्थ हावी भएपछि राजनीतिक मुल्य मान्यताले हावा खाएको छ ।
जसरी भएपनि आफु र आफ्नो दलले जित्ने र विपक्षीलाई जेसुकै गरेर भएपनि हराउने गैरराजनीतिक चरित्रका कारण चुनाव बहिस्कार भन्दै बम पड्काउने र सत्ताको साँचो लिएर जहाँ भेट्यो त्यही विद्रोहीलाई पक्राउ गर्नेहरु बीच नै तालमेल हुन पुगेको छ । यो भन्दा विचित्र के हुन्छ र ? अनौठा र आश्चर्य लाग्ने चुनावी तालमेलले कस्तो परिणाम दिन्छ त्यो भने असार १४ पछि थाहा हुने नै छ ।
वैशाख ३१ गतेको पहिलो चरणको स्थानीय निर्वाचनमा भएको तालमेलको परिमाण उल्टो देखिएको थियो । तर पनि तालमेल हुन छाडेको छैन । तर दलहरुले भने तालमेललाई स्थानीय आवश्यकता भन्ने गरेका छन ।
रुपन्देहीमा सत्तारुढ एकजुट
पश्चिम क्षेत्रको प्रमुख शहर बुटवल सहित रुपन्देहीका केही नगरपालिकामा काँग्रेस र माओवादी केन्द्र तथा जनमुक्ति पार्टी बीच तालमेल भएको छ । बुटवल उपमहानरमा काँग्रेसले प्रमुख र माओवादी केन्द्रले उपप्रमुखमा उम्मेदवारी दिएका छन ।
अर्को तर्फ निर्वाचन बहिस्कार गरेको राजपाले रुपन्देहीका दक्षिणी क्षेत्रका तीन गाँउपालिकामा स्वतन्त्र उम्मेदवार उठाएको छ । उसले कतै तालमेल भने गरेको छैन ।
गुल्मी र अर्घाखाँचीमा कांग्रेस र माओवादीको तालमेल भएको छ भने प्युठानमा माओवादी र राष्ट्रिय जनमोर्चा बीच चुनावी तालमेल भएको छ । यी क्षेत्रमा एमाले एक्लै मैदानमा छ ।
रोल्पामा अचम्मै भो
सवैभन्दा अचम्म तत्कालिन माओवादी जनयुद्दको उद्गम थलो रोल्पामा भएको छ । निर्वाचनलाई नाटक भन्दै बहिस्कार गर्दै आएको नेत्रविक्रम चन्द नेतृत्वको नेकपा माओवादी चुनावी मैदानमा उत्रिएको छ । कम्युनिष्टहरुको गढ रोल्पाको थवाङमा विप्लव माओवादीले सत्तारुढ दल काँग्रेससँग चुनावी तालमेल गरेको छ । उसले आफ्ना उम्मेदवारलाई स्वतन्त्र रुपमा उम्मेदवारी दिन लगाएर उठाएको छ भने काँग्रेससँग तालमेल गरेर उपाध्यक्ष दिएको छ । जेहोस चुनाव बहिस्कार गर्नेहरु कम्तिमा चुनावमा त आए । यसलाई सकारात्मक मान्दा हुन्छ ।
काँग्रेस एमाले मिले
रोल्पा मै एकअर्कालाई सत्तेसराप गर्ने काँग्रेस र एमाले पनि मिलेका छन । रोल्पाको माडी गाउँपालिकामा माओवादी केन्द्र एकातिर छ भने अर्कोतिर अध्यक्षमा काँग्रेस र उपाध्यक्षमा एमालेका उम्मेदवारबीच तालमेल भएको छ ।
मोरङ तालमेलको केन्द्र
प्रदेश नम्वर १ को मोरङमा पनि बिचित्रकै तालमेल भएको छ । विराटनगर महानगरपालिकाको प्रमुख पदमा प्रतिपक्षी एमाले र उपप्रमुखमा सत्तारुढ लोकतान्त्रिक फोरमबीच तालमेल भएको छ । यो तालमेललाई सद्भभावको तालमेल समेत भनिएको छ ।
विराटनगरमै सरकारलाई समर्थन गरेको संघीय समाजवादी फोरमलाई प्रमुख र सत्तारुढ माओवादी केन्द्रलाई उपप्रमुख पद बाँडेर तालमेल भएको छ ।
आफ्नो शक्ति बलियो भएको दावी गर्दै आएको काँग्रेस भने विराटनगरमा एक्लै चुनाव लड्दैछ ।
मोरङका अन्य गाउँपालिकामा समेत दलहरुबीच बहुरंगी तालमेल भएका छन ।
यस्तै पुर्वी नेपालको ताप्लेजुङमा कांग्रेस–माओवादीबीच, इलाममा कांग्रेस,माओवादी,संघीय समाजवादी फोरम र लोकतान्त्रिक राष्ट्रिय मञ्च आवद्ध लिम्बुवानबीच तालमेल भएको छ भने तेह्रथुममा काँग्रेस र माओवादी बीचको तालमेल छ ।
यस्तै धरानमा माओवादी–संघीय फोरमबीच तथा धनकुटामा कांग्रेस,राप्रपा र संघीय समाजवादी फोरमबीच तालमेल भएको छ । भोजपुरमा भने एमाले बाहेक सबै दल एक ठाउँमा उभिएर तालमेल गरेका छन ।
सैदान्तिक जग भन्दा तत्कालिन दाउमा आधारित तालमेलले दलहरुलाई एकअर्का बिरुद्ध आक्रामक हुन भने रोकेको छ । तर चुनावी तालमेलको परिणाम उल्टो देखिएको पहिलो चरणको निर्वाचनलाई हेर्दा यसपटकका तालमेलले समेत अपेक्षित नतिजा दिनेमा भने विश्वास गर्न गाह्रो छ ।
