बुटवल, असार ६ । बुटवललाई समृद्ध, पर्यटकीय र प्रादेशिक राजधानीसहितको सहर
बनाउने घोषण गर्दै एमालेले बुटवलको प्रतिबद्धतापत्र सार्वजनिक गरेको छ ।
बुटवलको समृद्धि एमालेको अर्जुनदृष्टि भन्दै पत्रकार सम्मेलन गरी
एमालेले प्रतिबद्धतापत्र सार्वजनिक गरेको हो ।
नेकपा एमालेले बुटवललाई प्रादेशिक राजधानी बनाउने उद्घोष सहितको
प्रतिबद्धतापत्र सार्वजनिक गर्दै चुनावी अभियानमा होमिएको बताएको छ । पाँच
नम्बर प्रदेश विभाजनका विरुद्ध चलको आन्दोलनमा एमालेले अगुवाई गरेको उल्लेख
गर्दै अब बुटवल उप–महानगरमा आउने नेतृत्वले प्रदेश विभाजनको मुद्धाको
छिनाफानो गर्ने उल्लेख गरिएको छ ।
बुटवलमा एमालेले मेयरमा शिवराज सुवेदी र उपमेयरमा गोमा आचार्यले
उम्मेदवारी दिएका छन् । सोमबार बुटवलमा पत्रकार सम्मेलन गरी नेकपा एमालेका
उपमाहासचिव विष्णु पौडेलले बुटवल उप–महानगरको प्रतिबद्धतापत्र सार्वजनिक
गरेका हुन् ।
उनले एमालेले सार्वजनिक गरेको प्रतिबद्धतापत्र एमालेको मात्र नभई आम
बुटवलबासीको भएको बताए । उनले बुटवलको विकासका लागि एमालेकै अगुवाइमा
काम भइरहेको भन्दै अब बुटवललाई देशकै विकासको रोलमोडल बनाउने बताए ।
रुपन्देही क्षेत्र नम्बर ४ का सांसद समेत रहेका पौडेलले कांग्रेस र माओवादी
अझै पनि पाँच नम्बर प्रदेश विभाजन गरेर तराई र पहाड अलग गराउने पक्षमा
रहेकाले बुटवलको भविष्यको रक्षा एमालेले मात्र गर्न सक्ने बताए । उनले भने
–‘एमालेकै कारण बुटवल र पहाडको सम्बन्ध अलग हुन दिएनौँ’ नेता पौडेलले
भने । उनले शरीर टुक्रा भए पनि प्रदेश पाँचबाट तराई र पहाड अलग हुन नदिने
प्रष्ट्याए ।
बुटवलमा अन्तर्राष्ट्रिय सभाहल बनाउनेदेखि लिएर कालिगण्डकी डाइभर्सन, सिक्स लेन
सडक निर्माण लगायतका योजनाहरु एमालेकै अगुवाई भएको दावी गर्दै बुटवलको
विकासका लागि एमालेका उम्मेदवारलाई विजय गराउनुको विकल्प नभएको बताए ।
एमालेले बुटवललाई प्रदेशको राजधानी, महानगर, औद्योगिक व्यापारिक र
नमुना सहर बनाउने योजना अघि सारेकाले यसको कार्यान्वयन एमालेले मात्र गर्न
सक्ने नेता पौडेलको तर्क छ ।
प्रतिबद्धतापत्रमा बुटवललाई स्मार्ट सिटी निर्माणका लागि पूर्वाधार विकास गर्ने, पारि बुटवललाई रात्रीकालीन बजारको
रुपमा विकास गर्ने, सुकुम्बासी समस्या सदाका लागि अन्त्य गर्ने, लुम्बिनी अञ्चल
अस्पतालाई स्तरउन्नति गर्ने, सामाजिक सुरक्षा भत्तालाई मासिक ५ हजार पु¥याउने,
अपाङ बृद्ध र वालबालिकालाई निःशुल्क यातायातको व्यवस्था गर्ने गरी प्रतिबद्धता
समावेश गरिएको छ ।
पत्रकार सम्मेलनमा प्रतिबद्धतापत्र मस्यौदाका संयोजक डी.आर.
घिमिरेले एमालेले ल्याएको प्रतिबद्धतापत्र बुटवलको साझा मुद्धा भएको बताए ।
उनले बुटवलको समृद्धिका लागि एमालेका उम्मेदवारले पूरा गर्ने गरी प्रतिबद्धताहरु
सार्वजनिक गरिएको बताए ।
निर्वाचन परिचालन कमिटिका संयोजक भोज प्रसाद श्रेष्ठले एमालेकै अगुवाइमा
विगतमा सुकुम्बासी समस्या केही हदसम्म हल गरेको बताउँदै अब प्रतिबद्धता अनुसार
नै बुटवललाई देशकै सर्वोत्कृष्ट नगरको रुपमा परिचित गराउने बेला आएको
बताए । उनले त्यसको नेतृत्व एमालेले गर्ने बताए । बुटवलमा असार १४ गतेको
स्थानीय तहको चुनाव नजिक आउँदै गर्दा एमालेले प्रतिबद्धतापत्र सार्वजनिक
गरिएको छ ।
