काठमाडौ । असार २७ ।एकसाता भित्र संविधान संशोधन गर्ने तयारी सहित अघि बढेको सत्तापक्ष अन्तत संशोधन प्रकृया अघि नबढाउने गरी आफै पछाडि फर्केको छ ।
संशोधनमा सहयोग गर्न सत्तारुढ दलहरुले गरेको आग्रहलाई प्रमुख प्रतिपक्ष दल नेकपा एमालेले आगामी असोज २ गते तय भएको स्थानीय तहको तेश्रो चरणको निर्वाचन अघि छलफल नगर्ने भनेपछि सरकार पछि हटेको हो ।
प्रधानमन्त्री निवास बालुवाटारमा प्रमुख तीन दल नेपाली काँग्रेस, नेकपा एमाले र नेकपा माओवादी केन्द्रबीच मंगलवार भएको छलफलमा एमालेले तत्काल संशोधन अघि बढ्न नसक्ने बताएको थियो ।
स्थानीय तहको चुनावपछि मात्र संशोधनका बिषयमा छलफल गर्न तयार रहेको भन्दै एमालेले तत्कालका लागि मुद्धा थाती राख्न सरकारलाई सुझाव दिएको एमाले उपाध्यक्ष भीम रावलले बताउनुभयो ।
बैठकमा एमालेका नेताहरुले निर्वाचन क्षेत्र निर्धारण आयोग गठन गर्न गर्न सरकारसँग आग्रह गरेको थिए ।
प्रधानमन्त्री शेरबहादुर देउवाले बालुवाटारमा आब्हान गर्नुभएको बैठकमा संशोधन विधेयकबारे छलफल भएको हो । छलफलमा सत्तारुढ दलका नेताहरुले संसदमा दर्ता संशोधन विधेयकलाई प्रक्रियामा लगेर टुङ्गाएर चुनावमा जानुपर्ने आवश्यकतामा जोड दिँदै त्यसमा सघाउन प्रमूख प्रतिपक्षी दलका नेताहरुलाई आग्रह गर्नुभएको थियो ।
एमालेले संविधान संशोधनमा असहमति जनाएसंगै सत्तारुढ दलहरुले राजपासँग छलफल गरि संशोधनका बिषयमा आधिकारिक धारणा सार्वजनिक गर्ने भन्दै उठेका थिए ।
बैठकमा प्रधानमन्त्री शेरबहादुर देउवा, एमाले अध्यक्ष केपी शर्मा ओली, माओवादी केन्द्रका अध्यक्ष प्रचण्ड, कांग्रेस नेताहरु रामचन्द्र पौडेल, बिमलेन्द्र निधि, एमाले नेताहरु माधवकुमार नेपाल, भीम रावल, सुवास नेम्वाङ, माओवादी केन्द्रका नेताहरु नारायणकाजी श्रेष्ठ र रामबहादुर थापा ‘बादल’ सहभागी हुनुहुन्थ्यो ।
त्यसपछि मंगलवार नै सत्तापक्षले राजपा नेपालका नेताहरुसँग पनि संशोधनबारे के गर्ने भन्ने बिषयमा छलफल गरे ।
उक्त छलफलमा राजपाका नेताहरुले संशोधन नभएसम्म चुनावमा जान सहज नहुने जवाफ दिएपछि सरकार थप अप्ठ्यारोमा परेको छ ।
राजपा नेताहरुले आफुहरु सरकारलाइ दिएको समर्थन फिर्ता लिने चेतावनी समेत दिएका थिए ।
