काठमाडौ । असार २९ । ब्यवस्थापिका संसदले आर्थिक वर्ष २०७४/७५ का लागि पूर्ण बजेट पारित गरेको छ ।
मुलुक संघियतामा गएपछि स्थानीय तहमा पठाउने गरि संसदको नियमित प्रक्रियाबाट पूर्ण बजेट पारित भएको यो पहिलो पटक हो ।
राष्ट्र ऋण उठाउने विधेयक र ऋण तथा जमानत विधेयक बिहिवारको संसदको बहुमतले स्वीकृत गरेपछि पूर्ण बजेट पारित गर्ने सबै प्रक्रिया पूरा भएको छ । विनियोजन विधेयक र आर्थिक विधेयक संसदले यसअघि नै पारित गरेको थियो ।
गत जेठ १५ गते संसदमा अर्थमन्त्री कृष्णबहादुर महराले आर्थिक वर्षका लागि १२ खर्ब ७८ अर्ब ९९ करोड ४८ लाख ५५ हजार रुपैयाँको बजेट प्रस्तुत गर्नुभएको थियो ।
विनियोजित रकममध्ये आठ खर्ब तीन अर्ब ५३ करोड १४ लाख ५४ हजार रुपैयाँ चालुतर्फ र तीन खर्ब ३५ अर्ब १५ करोड ५९ लाख ७० हजार रुपैयाँ पुँजीगततर्फ र वित्तिय व्यवस्थातर्फ १ खर्ब ४० अर्ब २८ करोड रुपैयाँ छुट्याइएको थियो ।
