काठमाडौ । साउन २। राष्ट्रपति विद्यादेवी भण्डारीले प्रधानन्यायाधीशमा गोपाल पराजुलीलाई नियुक्त गरि पद तथा गोपनीयताको शपथ गराउनुभएको छ । राष्ट्रपति श्रीमती विद्यादेवी भण्डारीज्यूले नेपालको संविधानको धारा १२९ को उपधारा (२) बमोजिम संवैधानिक परिषद्को सिफारिसमा सर्वोच्च अदालतका वरिष्ठतम माननीय न्यायाधीश श्री गोपाल पराजुलीज्यूलाई नेपालको प्रधान न्यायाधीश पदमा नियुक्त गर्नुभएको हो । राष्ट्रपति कार्यालय शितल निवासमा आयोजित शपथ समारोहमा उपराष्ट्रपति नन्दबहादुर पुन, प्रधानमन्त्री शेरबहादुर देउवा, सभामुख ओनसरी घर्ती, सर्वोच्च अदालतका न्यायाधीशहरु, न्यायपरिषदका सदस्यहरु, संवैधानिक निकायका प्रमुखहरु, नेपाल सरकारका उच्चपदस्थ पदाधिकारीहरु र सुरक्षा निकायका प्रमुखहरु लगायतको उपस्थिति थियो । पराजुली आगामी वैशाखसम्म प्रधानन्यायाधीश रहनुहुनेछ । सर्वोच्च अदालतका वरिष्ठतम न्यायाधीश पराजुलीलाई संवैधानिक परिषदले प्रधानन्यायाधीशमा सिफारिस गरेपछि संसदीय सुनुवाई विशेष समितिबाट उनको नाम सर्वसम्मतिले अनुमोदन भएको थियो।
