काठमाडौ । साउन २७ । काठमाडौं उपत्यकामा दश बर्षसम्म नयाँ मेडिकल कलेज खोल्न नपाउने तथा मापदण्ड पुगेका मेडिकल कलेजहरुलाई सम्वन्धन दिन सकिने व्यवस्था राखेर राष्ट्रिय चिकित्सा शिक्षा विधेयक सम्वन्धित समितिवाट पारित भएको छ ।
समितिले पारित गरेको विधेयकलाई संसदले पारित गरेपछि कानूनी मान्यता सहित कार्यान्वयनमा आउने छ । डाक्टर गोविन्द केसीले छिटो पारित गर्न माग गर्दै अनसनमा बसिरहेका बेला संसदको महिला, बालबालिका, जेष्ठ नागरिक र समाज कल्याण समितिको शुक्रवारको बैठकले बहुचर्चित र विवादास्पद चिकित्सा शिक्षा विधेयकलाई पारित गरेको हो ।
विधेयकमा नीजि अस्पताल पुर्णरुपमा संचालन भएको ३ बर्ष पछि मात्रै मेडिकलको सम्वन्धन लिन आवेदन दिन सकिने र मापदण्ड पुगेका कलेजहरुलाई सम्वन्धन दिन सकिने प्रस्ताव गरिएको छ । विधेयकमा छात्रवृतिको व्यवस्था पनि राखिएको छ ।
प्रस्तावनामा नै माथेमा आयोगको भावना र मर्मलाई समावेश गर्ने उल्लेख गर्दै अन्तिम रुप दिइएको विधेयकमा नयाँ सम्वन्धन प्राप्तिका लागी स्वास्थ्य मन्त्रालय र आयोगले तोकेको मापदण्ड पुरा गर्नुपर्ने ब्यवस्था गरिएको छ । उपप्रधान तथा शिक्षा मन्त्री गोपालमान श्रेष्ठले विधेयकलाई समितिले पारित गरेपछि डाक्टर गोविन्द केसीका माग संवोधन हुने विश्वास सरकारले लिएको बताउनुभयो ।
यसअघि प्रधानमन्त्री शेरबहादुर देउवाले डाक्टर गोविन्द केसीको माग सम्वोधनका वारेमा शिक्षामन्त्री गोपालमान श्रेष्ठ, स्वास्थ्य मन्त्री गिरीराजमणी पोखरेल र दुवै पक्षका वार्ता टोलीसंग छलफल गर्नुभएको थियो ।
उता डाक्टर केसीको स्वास्थ्य अवस्था नाजुक बनिसक्दा समेत राज्यले वेवास्ता गरेको भन्दै सरकारी चिकित्सक संघ नेपाल, रेजिडेन्ट एसोसिएसन अफ नेपाल ‘नेम्स’ र डक्टर सोसाइटी अफ नेपालको आह्वानमा शुक्रवार सरकारी अस्पतालमा आकस्मिक बाहेकका सवै ठप्प पारियो।
