काठमाडौ । भदौ १९ । अवैध रुपमा नेपाल भित्र्याइएको अहिलेसम्मकै सवैभन्दा धेरै सुन काठमाडौंमा बरामद भएको छ ।
प्रहरीले काठमाडौको क्षेत्रपाटीबाट ८८ किलो सुनसहित सोमवार विहान चालक मनोज अधिकारीलाई पक्राउ गरेको हो । बरामद सुनको चल्तिको मुल्य ४३ करोड भन्दा बढी हो ।
पार्किङमा राखिएको बा १७ च ६४२७ नम्वरको जीपबाट गोप्य सुचनाका आधारमा महानगरीय अपराध महाशाखाले सुन बरामद गरेको एसएसपी दिवेश लोहनीले जानकारी दिए ।
श्रोतका अनुसार केरुङबाटै सेटिङमा सुन ल्याइएकोले भन्सारमा सवै गाडी चेकिङ भएपनि उक्त सुन बोकेको गाडीलाई चेकिङ नै गरिएको थिएन ।
गएराती नै गाडी निगरानीमा राखिएको र विहान चालकले गाडी स्टार्ट गर्नासाथ प्रहरी टोलीले नियन्त्रणमा लिएको बताइएको छ ।
पत्रकार सम्मेलनमा प्रहरीले दिएको जानकारी अनुसार चीनको केरुङ हुँदै उक्त सुन ल्याइएको हो । सुन ल्याएको अभियोगमा एक चिनिया नागरिक पनि पक्राउ परेका छन।
नेपालबाट अहिलेसम्म यतिधेरै सुन पक्राउ परेको इतिहास नभएको पनि प्रहरीले जनाएको छ । यसअघि गत फागुनमा सवैभन्दा बढी पक्राउ परेको भनिएको सुन एयरपोर्टवाट उम्केर होटल पुगेको ३३ किलो हो ।
