बुटवल । कार्तिक ३ । तिहार अर्थात यमपञ्चकको चौथो दिन शुक्रवार गोवर्द्धन पूजा गरी मनाइँदैछ ।
शनिवार टिकाको दिन हो । यस बर्ष टिकाको उत्तम साइत विहान ११ बजेर ५१ मिनेटमा रहेको पन्चाङ्ग निर्णायक समितिले जनाएको छ ।
टिकाको दिन दिदीबहिनीले आफ्ना दाजुभाइलाई सप्तरंगी टिका र माला लगाइदिने तथा रोटी र मिठामिठा परिकार खान दिन्छन । टिका लगाउँदा दाजुभाइले एक तीन र पाँच धर्के टिका लगाउने प्रचलन छ ।
उपहार आदान प्रदान गर्ने र शत्रुवैरी नास होस भनि मुल ढोकाको संघारमा एउटा खुट्टा भित्र र अर्को खुट्टा बाहिर गराइ दिदीबहिनीले ओखर फोड्ने पनि चलन छ ।
अघिल्लो दिन गोवर्धन पुजा र गाइ तथा गोरुको समेत पुजा गरिन्छ । गाईलाई पवित्र मानी पूजा गर्ने वैदिक सनातन कालदेखिको चलन हो । वर्षभर जोतिएर मानव हितका लागि सेवा गर्ने गोरुलाई पनि पूजाआजा गरी मीठामीठा खानेकुरा खान दिने प्रचलन छ ।
गाईको पूजा गरी दिन मीठा मीठा परिकार खान दिएमा गाईबाट पाइने शुद्धता सधैं प्राप्त हुने धार्मिक विश्वास रहिआएको छ ।
घरगोठ र आँगनमा लिपपोत गरी गाईको गोबरको पर्वत बनाई त्यसलाई गोवर्द्धन पर्वत मानेर पूजा गर्ने गरिन्छ । द्वापर युगमा भगवान श्रीकृष्णले हत्केलाले गोवर्द्धन पर्वत उचाली गोकुलवासीलाई मुसलधारे वर्षा हुनबाट बचाएको सम्झनामा गोवर्द्धन पर्वतको पूजा गर्ने प्रचलन रहिआएको हो ।
