बुटवल, पुस ५ । वीरगन्ज महानगरपालिकाको जगन्नाथपुरमा रहेको सुपर ग्यास उद्योगमा बुधवार आगलागी भएको छ । वीरगन्ज महानगरपालिकाका वारुणयन्त्रका दुई जना कर्मचारीको आगो निभाउन जाने क्रममा आगोमा परेर मृत्यु भएको छ ।
आगो करिब ८ घण्टापछि निभाइएको छ । मध्यान्ह १ बजेतिर सुरक्षाकर्मी र स्थानीयले एस्टिङ्गुइसर र भिजेको बोराको सहायताले आगो निभाउन सफल भएका हुन् ।
बिहान ६ बजेदेखि भएको आगलागी अपरान्ह दुर्इ बजे नियन्त्रणमा आएको हो । दमकलले आगो निभाउने प्रयास गर्दा दुर्इ जना दमकलका कर्मचारी मधुसुदन मिश्र, यादवप्रसाद अधिकारीको मृत्यु भएको प्रहरीले पुष्टि गरेको छ । चालक अरुणकुमार महतो र फायरम्यान सञ्जीवकुमार नेपाल घाइते छन ।
दुबै जनालाई उपचारका लागि हेलिकोप्टरबाट काठमाडौ ल्याइएको छ । जनधनको क्षति हुन नदिन प्रहरीले माइकिङ गरेर वरिपरीको बस्तीलाई खाली गराएको थियो ।
क्षतिको सम्पूर्ण विवरण आउन अझै समय लाग्ने पर्सा प्रहरीले जनाएको छ । यसैबीच एलपी ग्यास उद्योग संघले राजधानीमा पत्रकार सम्मेलन आयोजना गरेर ग्याँसको बुलेटलाई बन्द नगरि खन्याउदा आगो लागेको हुन सक्ने अनुमान गरिएको जनाएको छ ।
मुलुकभित्र ग्याँस उद्योगमा यति ठुलो दुर्घटना पहिलो पटक भएको भन्दै संघले छानवीन गर्न समिति पनि गठन गरेको छ ।
