बुटवल, पुस ५ । राष्ट्रपति विद्यादेवी भण्डारीले राष्ट्रियसभा निर्वाचन सम्वन्धी अध्यादेशमा राजनीतिक सहमति जुटाएर समाधान निकाल्न एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाललाई आग्रह गर्नुभएको छ ।
राष्ट्रपति कार्यालय शितल निवासमा बुधवार विहान भेट्न पुगेका नेताद्धयलाई राष्ट्रपति भण्डारीले अध्यादेश अध्ययनकै क्रममा रहेको र दलीय सहमतिविना अघि वढाउन समस्या हुने सुझाव दिनुभएको थियो ।
उहाँले सरकार र दलका नेताहरुले राष्ट्रपतिमाथि दोष थोपरेर आफ्नो स्वार्थ पुरा गर्न खोजेको देखिएको भन्दै असन्तुष्ठी समेत जनाउनुभएको थियो । तर राष्ट्रपतिका मुख्य स्वकीय सचिव भेषराज अधिकारीले समानुपातिकको नतिजा सार्वजनिक भएपछि सरकार गठन प्रकृया अघि वढ्ने बताउनुभयो ।
तर सरकार भने अध्यादेश पारित नगरे टसको मस नहुने अडानमा देखिन थालेको छ । उसले बिहिवारको मन्त्रीपरिषद बैठक पनि नबोलाउने र प्रदेश प्रमुख पनि नतोक्ने संकेत देखाएको छ ।
तर एमाले अध्यक्ष केपी शर्मा ओलीले भने सरकार छिट्टै गठन हुने बताउनुभएको छ ।
बुधवार राजधानीमा आयोजित कार्यक्रममा ओलीले काम चलाउ सरकारले आफ्नो स्वार्थ अनुसार ल्याएको अध्यादेश कुनैपनि हालतमा पारित नहुने बताउनुभयो ।
