काठमाडौ । पुस १४ । राष्ट्रपति विद्यादेवी भण्डारीले राष्ट्रियसभा निर्वाचन अध्यादेश जारी गर्नुभएको छ ।
पौष १४ गते शुक्रबारका दिन सम्माननीय राष्ट्रपति श्रीमती विद्यादेवी भण्डारीज्यूले मन्त्रिपरिषद्को मिति २०७४ साल कार्तिक ६ को बैठकबाट सिफारिस भएको देहाय बमोजिमको अध्यादेश नेपालको संविधानको धारा ११४ को उपधारा १ बमोजिम जारी गर्नुभएको छ–राष्ट्रपति कार्यालयका प्रवक्ता कुलप्रसाद चुडालद्वारा जारी विज्ञप्तिमा उल्लेख गरिएको छ ।
प्रधानमन्त्री शेरबहादुर देउवासँग भेटेपछि राष्ट्रपति भण्डारीले राष्ट्रियसभा निर्वाचन अध्यादेश जारी गर्नुभएको हो । राष्ट्रपति भण्डारीले एमाले अध्यक्ष केपी शर्मा ओलीसँग पनि परामर्श गर्नुभएको थियो ।
यस्तै एमाले नेता सुवासचन्द्र नेम्वाङसँग पनि आजै परामर्श गर्नुभएको थियो । प्रधानमन्त्री देउवासँग भेटे लगत्तै राष्ट्रपतिले अध्यादेश प्रमाणीकरण गर्नुभएको राष्ट्रपतिका स्वकीय सचिव भेषराज अधिकारीले जानकारी दिनुभयो ।
अध्यादेश स्वीकृतिसँगै नयाँ सरकार गठन गर्ने बाटो खुल्ला भएको छ। प्रधानमन्त्रीसँगको परामर्शमा राष्ट्रपतिले दलबीचको विवाद मिलाउन प्रयास गर्दा पनि सहमति नभएपछि आफुले संवैधानिक दायराभित्र रहेर विधेयक प्रमाणीकरण गर्न लागेको जानकारी दिनुभएको थियो । उहाँले दलहरुबीचको विवाद मिलाउन प्रधानमन्त्री देउवालाई सुझाव समेत दिनुभयो ।
अध्यादेशमा राष्ट्रियसभा सदस्यको निर्वाचन एकल संक्रमणीय प्रणालीमा गर्ने ब्यवस्था छ । दलहरुबीच राष्ट्रियसभा कानूनका बिषयमा विवाद भएर संसदबाट पारित हुन नसकेपछि सरकारले गत असोज अन्तिमसाता अध्यादेश राष्ट्रपति समक्ष पेश गरेको थियो ।
राष्ट्रपतिले अध्यादेश वारे दलहरु विचको विवाद मलाउन पटक पटक परामर्श गर्नु भएको थियो । राष्ट्रियसभा निर्वाचन अध्यादेश जारी नहुँदा समानुपातिक तर्फको निर्वाचन परिणाम र नयाँ सरकार गठन प्रकृया नै अन्योलमा पर्दै आएको थियो ।
