केशव भण्डारी
बुटवल । माघ ७ । पाँच नम्बर प्रदेशमा प्रदेशसभा सदस्यहरुको शपथ ग्रहण भएको छ । प्रदेश प्रमुख उमाकान्त झाले प्रदेशसभाका जेष्ठ सदस्य बलदेव शर्मालाई शपथ गराउनुभएको थियो ।
त्यसपछि शर्माले अन्य सदस्यहरुलाई शपथ गराउनुभएको थियो । पाँच नम्वर प्रदेशका १२ जिल्लाबाट प्रत्यक्ष ५२ समानुपातिक ३५ गरि ८७ जना प्रदेश सदस्य छन् ।
बसपार्क नजिकै उद्योग बाणिज्य संघको हलमा भएको शपथ ग्रहण समारोह विशेष बनाइएको थियो । कार्यक्रममा राजनीतिक दलका वरिष्ठ नेताहरु पनि सहभागी भएका थिए ।
शपथ सकिए लगत्तै एमालेका सांसदहरुको बैठक पार्टीको प्रदेश कार्यालयमा शुरु भएको छ । यसैगरी काँग्रेसले आफ्ना प्रदेश सांसदका लागि चियापान आयोजना गर्दैछ ।
यसैगरी प्रदेश नम्बर दुईमा प्रदेश प्रमुख रत्नेश्वरलाल कायस्थले ज्येष्ठ सदस्य लगनलाल चौधरीलाई जनकपुर उद्योग वाणिज्य संघको हलमा शपथ गराउनुभयो । त्यसपछि अन्य सदस्यहरुलाई चौधरीले शपथ गराउनुभएको छ । सदस्यहरुले मातृभाषामा समेत शपथ लिएका छन् । शपथका क्रममा भाषाबारे विवाद समेत भएको थियो । दुई नम्बर प्रदेशमा प्रत्यक्षतर्फ ६४ र समानुपातिकतर्फ ४३ सदस्य छन् । प्रदेश नम्बर २ को प्रदेश सभा अधिवेशन माघ २१ गतेका लागि तय भएको छ ।
यता, एक नम्बर प्रदेश प्रमुख गोविन्दबहादुर सुब्बाले ज्येष्ठ सदस्य ओमप्रकाश सरावगीलाई विराटनगरस्थित वीरेन्द्र सभागृहमा शपथ गराउनुभएको छ त्यसपछि अन्य सदस्यलाई सरावगीले शपथ गराउनुभएको छ ।
यस्तै प्रदेश नम्बर ३ मा प्रदेश प्रमुख अनुराधा कोइरालाले ज्येष्ठ सदस्य डोरमणि पौडेललाई हेटौंडास्थित मध्यमाञ्चल क्षेत्रीय शिक्षा निर्देशनालयको भवनमा शपथ गराउनुभयो । त्यसपछि पौडेलले अन्य सदस्यलाई शपथ गराउनुभयो ।
प्रदेश नम्बर तीनमा प्रत्यक्षतर्फ ६६ र समानुपातिकतर्फ ४४ सदस्य छन् ।
प्रदेश नम्बर चारमा प्रदेश प्रमुख बाबुराम कुँवरले ज्येष्ठ प्रदेश सदस्य जनकलाल श्रेष्ठलाई पोखराको नदीपुरस्थित नगर विकास प्रशिक्षण केन्द्रमा पद तथा गोपनीयताको शपथ गराउनुभयो । त्यसपछि श्रेष्ठले अन्य सदस्यहरुलाई शपथ गराउनुभयो । शपथ ग्रहण कार्यक्रममा मनाङका प्रदेशसभा सदस्य दीपक मनाङ्गे र तनहुँका रामबहादुर गुरुङ
उपस्थित भएनन्। चार नम्बर प्रदेशमा प्रत्यक्षतर्फ ३६ र समानुपातिकतर्फ २४ सदस्य छन् ।
प्रदेश नम्वर छ नम्बर प्रदेशका ४० सदस्यको शपथ सुर्खेतस्थित जिल्ला समन्वय समितिको सभाहलमा गराइने भएको छ ।६ नम्वर प्रदेशमा प्रत्यक्षतर्फ २४ र समानुपातिकतर्फ १६ गरी ४० सदस्य छन् ।
त्यस्तै सात नम्बर प्रदेशका ५३ सदस्यले जिल्ला समन्वय समिति कैलालीको सभा कक्षमा शपथग्रहण गर्दैछन् । ७ नम्वर प्रदेशमा प्रत्यक्ष तर्फ ३२ र समानुपातिकतर्फ २१ गरी ५३ जना सदस्य छन् ।
प्रदेश सांसदको सपथ भएपछि प्रदेश सभाको पहिलो बैठक बस्नेछ। निर्वाचन आयोगले प्रेदश प्रमुखलाई प्रदेश सभाको परिणाम बुझाएको २० दिनभित्र प्रदेश सभाको पहिलो बैठक बस्नु पर्ने संईवैधानिक व्यवस्था छ।
