काठमाडौँ– माघ ११। नेपाली कांग्रेसको भातृ संगठन नेविसंघ वीरगञ्जमा भारतले मिचेको सीमाको अवलोकनका मिचिएको सीमामा पुगेको छ ।
सीमा अवलोकनका लागि उच्च स्तरीय प्रतिनिधिमण्डलसहित नेविसंघ पर्सा जिल्लाको वीरगञ्ज महानगरपालिका १ स्थित छपकैयामा पुगेको हो । अबलोकनपछि समस्या समाधानका लागि नेपाल सरकारलाई दबाब दिने र भारत सरकारलाई राजदूतावासमार्फत ज्ञापन पत्र बुझाउने तयारी नेविसंघले गरेको छ ।
नेविसंघले यस अघि पनि नेपाली सीमाको रक्षा गर्नभन्दै काठमाडौँमा र्याली निकालेको थियो ।
वीरगन्ज महानगरपालिका वडा नम्बर १ को छपकैयामा पर्ने जंगे पिलर ३९१ को ३८ र ३९ तथा ३९२ को ७, ८, ९ ,१० , २७ र २८ नम्बरको सहायक पिलर नेपाल तर्फ परेपछि बर्षौदेखि भोग चलन गर्दै आएको करिब ५० बिघा नेपाली भूमी भारततर्फ पर्न गएको स्थानीयवासीले दाबी गर्दै आएका छन् ।
सीमामा हराएका र जीर्ण भएका सीमा स्तम्भ (पिलर) मर्मत र निर्माणका क्रममा ५० विगाहा जमिन भारतले आफ्नोतर्फ लिएको भन्दै चौतर्फी विरोध भइरहेको छ ।
यसैबीच प्रधानमन्त्री शेरबहादुर देउवाले राजधानीमा बाम गठबन्धनका विद्यार्थीहरुको ज्ञापनपत्र बुझ्दै नेपाली सिमा एकइन्च पनि अतिक्रमण हुन नदिने प्रतिवद्धता जनाउनुभएको छ ।
