तिलोत्तमा, चैत १ । तिलोत्तमा नगरपालिकामा बिहीबार वृहद् सरसफाई गरिएको
छ । नगरपालिकाले सञ्चालन गर्दै आएको समुदायमा आधारित सरसफाई अभियानको
१३ औं श्रृंखला बिहीबार सम्पन्न भएको हो । नगरपालिकाले हरेक महिनाको १ र
१५ गते समुदायमा आधारित सरसफाई अभियान सञ्चालन गर्दै आएको छ ।
बिहीबार तिलोत्तमा नगरपालिकाका विभिन्न वडाका अतिरिक्त बुटवल–बेलहिया
सिक्सलेन सडकको योगिकुटी–मणिग्राम खण्डमा विशेष सरसफाई गरिएको नगर
प्रमुख बासुदेव घिमिरेले जानकारी दिनुभयो । मणिग्राम, नयाँमिल,
ड्राइभरटोल, शंकरनगर, जानकीनगर, योगिकुटीबाट एक साथ सरसफाई अभियन्ताहरु
सडकमा निस्किएर सरसफाईमा जुटेका थिए ।
नगरपालिकाले योगिकुटीदेखि मणिग्रामसम्मको सिक्सलेन सडकमा ‘मानव साङ्लो’
को नाम दिएर सरसफाई गरेको हो । सरसफाई अभियानमा जनप्रतिनिधिहरुका
साथै, कर्मचारी, विभिन्न संघ–संस्था, क्लव, आमा समूह, टोल विकास संस्था,
शिक्षण संस्थालगायत स्थानीय बासिन्दाको ठूलो सहभागिता रहेको थियो ।
अभियन्ताहरुले घरमा उत्पादित फोहोर घरमैं व्यवस्थापन गर्न स्थानीय
बासिन्दालाई आग्रह गर्दै सरसफाई अभियानको स्वमित्व लिन व्यक्ति, परिवार र
समुदायलाई आग्रह गरेका छन् । सरसफाई कार्यक्रमको मणिग्राममा शुभारम्भ
गर्दै प्रदेशसभा सदस्य लिला गिरीले अभियानलाई अब व्यक्ति र समुदायको
स्वास्थ्यसँग जोडेर अघि बढाइनुपर्ने बताउनुभयो ।
नगरपालिकाले सुरु गरेको सरसफाई अभियान सबैको साझा अभियान भएकाले यसमा
सबैको सहभागिता रहनुपर्नेमा जोड दिँदै प्रदेशसभा सदस्य गिरीले यो अभियान
अन्य स्थानीय तहका लागि पनि अनुकरणीय रहेको उल्लेख गर्नुभयो । नगरप्रमुख
बासुदेव घिमिरेले सरसफाई अभियानसँगै नगरपालिकाले फोहोरको वैज्ञानिक
व्यवस्थापनका लागि योजना अघि बढाएको जानकारी दिनुभयो ।
हरेक व्यक्ति सचेत भएमा फोहोर कम हुने बताउँदै उहाँले गुड्खा तथा जंङ्क
फूडका खोल तथा प्लाष्टिकलाई जथाभावी नफाल्न नगरबासीलाई अनुरोध
गर्नुभयो । सार्वजनिक स्थानमा जथाभावी फोहोर गर्नेहरुलाई प्रचलित कानुन
अनुसार कारवाही गर्न नगरपालिका बाध्य हुने बताउँदै उहाँले सरसफाई
अभियानको स्वामित्व सबैले लिनुपर्नेमा जोड दिनुभयो ।
कार्यक्रममा नगर उप–प्रमुख जागेश्वरी चौधरी, प्रमुख प्रशासकीय अधिकृत कृष्ण
प्रसाद सापकोटालगायतले सरसफाईको बहुआयामिक महत्वका बारेमा प्रकाश
पार्नुभएको थियो । यस्तै खानेपानी तथा सरसफाई उपभोक्ता संस्था रुपन्देहीका
अध्यक्ष धु्रव धितालले नगरपालिकाको अभियानलाई प्रत्येक संस्थाले सहयोग
गरिरहेको बताउँदै यसले जिल्लाका सबै स्थानीय तहमा प्रभाव पार्ने बताउनुभयो
