पैदल फर्केकालाई गन्तव्यमा पुर्याइदिनु–सर्वोच्च, जहाँ पुगेका छन् त्यही रोक्नु–प्रधानमन्त्री
राजमार्ग हुँदै सयौं किलोमिटर पैदल हिडेर घर फर्किरहेका मजदुर र विपन्नहरुले अत्यधिक सास्ती पाएपछि सर्वोच्च अदालतले बाध्यतामा परेका तथा पैदल हिँडेकाहरुलाई गन्तव्यमा पुर्याइदिन सरकारलाई आदेश दिएको छ । तर प्रधानमन्त्री केपी शर्मा ओलीले भने लकडाउनलाई कडाइका साथ पालना गराउन र जो जहाँ छन्, त्यहीँ व्यवस्थापन गर्न मन्त्रीहरुलाई निर्देशन दिएका छन् ।
सर्वोच्च अदालतले शुक्रवार पैदल घर फर्किरहेका बिपन्नलाई प्राथमिकतामा राखेर निस्शुल्क र सवारी साधनको समेत व्यवस्था गरेर भएपनि गन्तव्यमा पुर्याइ दिन आदेश दिएको हो । न्यायाधीश आनन्दमोहन भट्टराई र सपना मल्लको इजलासले पैदल यात्रीको स्वास्थ्य परीक्षण सहित सुरक्षाका उपाय अवलम्बन गर्न पनि सरकारलाई निर्देशन दिएको छ ।
उता प्रधानमन्त्री ओलीले शुक्रबार नैकोरोना भाइरस रोकथाम सम्बन्धी उच्चस्तरीय समितिका सदस्यस्यलाई लकडाउनका बेला कसैलाई पनि एक ठाउँबाट अर्को ठाउँमा हिंडेर जानबाट रोक्न भनेका हुन् । हिड्नेहरुलाई रोक्न नसके महामारी पनि रोक्न नसकिने प्रधानमन्त्रीको भनाई थियो । खान र बस्न समस्या भए सरकारले ब्यवस्थापन गर्ने प्रधानको भनाई छ ।
