बुटवल ७
कोरोना जितेर घर फर्किन प्रसिद्दि,बागलुङकी महिलाको पनि अन्तिम रिपोर्ट नेगेटिभ
बुटवल । कोरोना भाइरस संक्रमणलाई जितेर काठमाडौंकी प्रसिद्दी श्रेष्ठ २७ दिनपछि घर फर्केकी छन् ।
कोरोना संक्रमण भएर शहिद शुक्रराज ट्रपिक तथा सरूवा रोग अस्पतालमा २७ दिनसम्म उपचार गरेपछि पूर्ण रूपमा स्वस्थ भएर १९ बर्षिय प्रसिद्दी शनिबार घर फर्किएकी हुन ।
अस्पतालबाट डिस्चार्ज भएपछि उनले नेपाल टेलिभिजन मार्फत अस्पताल बसाइको अनुभव साट्दै घरबाहिर ननिस्कन सबैंलाइ आग्रह समेत गरेकी छन् ।
गत चैत ४ गते फ्रान्सबाट कतार हुँदै उनी नेपाल आएकी उनी ९ गते अस्पताल गएर परीक्षण गराएकी थिइन् ।
अस्पतालबाट फर्केपछि उनले निको हुनुलाइ मौकाको रुपमा लिएको पनि बताइन । अस्पतालमा उपचारमा खटिएका चिकित्सक अनुप श्रेष्ठले प्रसिद्दी निको भएको र दुइटा पिसिआर टेस्ट नेगेटिभ आएपछि उनलाई डिस्चार्ज गरिएको बताए ।
यसैबीच कोभिड(१९ संक्रमित बागलुङकी ६५ वर्षीया महिलाको पनि अन्तिम रिपोर्ट नेगेटिभ आएको जिल्ला जनस्वास्थ्य कार्यालय बागलुङले जनाएको छ । उनलाई पनि डिस्चार्ज गर्ने तयारी अस्पतालले गरेको छ ।
संक्रमण पुष्टि भएपछि चैत २० गते उनलाई धौलागिरि अञ्चल अस्पतालमा भर्ना गरिएको थियो । उनी पनि चैत ४ गते उनी बेल्जियमबाट कतार हुँदै नेपाल आएकी थिइन् ।
