आर्थिक वर्ष २०७७।०७८ का लागि १४ खर्ब ७४ अर्ब ६४ करोडको बजेट
काठमाडौं । जेठ १५ । कोरोनाको महामारीबीच स्वास्थ्य पूर्वाधारको विकास र आर्थिक पुनरुत्थानलाई मुख्य प्राथमिकतामा राखेर सरकारले आर्थिक वर्ष २०७७।०७८ का लागि १४ खर्ब ७४ अर्ब ६४ करोडको बजेट ल्याएको छ ।
अर्थमन्त्री युवराज खतिवडाले विहिवार प्रतिनिधिसभा र राष्ट्रियसभाको संयुक्त बैठकमा चालुतर्फ ९ खर्ब ४८ अर्ब र पुँजीगततर्फ ३ खर्ब ५२ अर्ब सहितको बजेट बजेट प्रस्तुत गरेका हुन् ।
बजेट चालुबर्षको भन्दा ८८ अर्ब रुपैयाँले बढी हो । बजेटमा ७ प्रतिशत आर्थिक वृद्धिको लक्ष्य राखिएको छ ।
अर्थमन्त्री खतिवडाले बजेटकार्यान्वयनका लागि ८ खर्ब ८९ अर्ब राजस्व संकलन गर्ने र अपुगरकममध्ये २ खर्ब ९९ अर्ब वैदेशिक ऋण तथा २ खर्ब २५ अर्ब आन्तरिक ऋण उठाउने बताउनुभयो ।
बजेटले स्वास्थ्य, कृषि र रोजगार सृजनामा जोड दिएको छ । समग्र स्वास्थ्य क्षेत्रको विकासका लागि ९० अर्ब ६९ करोड रूपैयाँ विनियोजनगरिएको छ भने कृषि क्षेत्रको बजेट ६ अर्ब बढाएर ४० अर्ब पुर्याइएको छ ।सबै स्थानीय तहमा ५ देखि १५ शय्याका २ सय ७२ अस्पताल स्थापना गर्न १४ अर्ब २७ करोड छुट्याइएको छ ।
साना, मझौला उद्योग र पर्यटन लगायत उद्योगीले कर्मचारीलाई तलब भुक्तानी गर्न ऋण लिन सकिने गरी ५० अर्बको कोषसमेत खडा गर्ने घोषणा गरिएको छ ।
यस्तै कोरोना भाइरसको कहरले प्रभावित आर्थिक क्षेत्रको पुनरुत्थानका पनि कार्यक्रम ल्याइएको छ ।
यस्तै शैक्षिक तथा विज्ञान प्रविधिको क्षेत्रको बजेट ९ अर्ब बढाएर १ खर्ब ७१ अर्ब पुर्यारइएको छ ।
