काठमाडौँ,असार १६ । सत्तारुढ नेकपाका शीर्ष नेताहरुले नै प्रधानमन्त्री केपी शर्मा ओलीको राजीनामा मागेका छन् ।
ओलीका कारण पार्टी र सरकार अप्ठ्यारोमा परेको भन्दै स्थायी समितिको बैठकमा नेताहरुले दुवै पदबाट ओलीले राजीनामा दिनुपर्ने माग गरेका हुन् ।
प्रधानमन्त्री निवास बालुवाटारमा मंगलबार बसेको चौथौ दिनको स्थायी समिति बैठकमा अर्का अध्यक्ष पुष्पकमल दाहाल,वरिष्ठ नेताद्वय झलनाथ खनाल र माधवकुमार नेपाल नै प्रधानमन्त्री ओलीको राजीनामाको पक्षमा उभिएका छन् । श्रोतका अनुसार बैठकमा अध्यक्ष दाहालले भारतले नभै आफूले प्रधानमन्त्रीको राजीनामा मागेको बताएका थिए ।
यस्तै नेकपा एमाले दर्ताका लागि निर्वाचनमा आयोगमा निवेदन पुगेको बिषयले पनि नेकपामा रडाको मच्चिएको छ ।
अध्यक्ष दाहालले प्रश्न गरेपछि प्रधानमन्त्री ओलीले ‘म यही पार्टीको अध्यक्ष हुँ, मेरो पार्टी यही हो’ भन्ने जवाफ दिएका थिए । झापाकी सन्ध्या तिवारीको अध्यक्षतामा एमाले पार्टी दर्ताका लागि निर्वाचन आयोगमा आवेदन दिएको भन्ने सूचनापछि बैठकमा छलफल भएको प्रवक्ता नारायणकाजी श्रेष्ठले बताउनुभयो ।
मंगलवारको बैठकमा वामदेव गौतम, नाराणकाजी श्रेष्ठ, बेदुराम भुसाल, मुकुन्द न्यौपाने, अष्टलक्ष्मी शाक्य, भिम रावल, रघुजी पन्त, गणेश शाह, सुरेन्द्र पाण्डे, जनार्दन शर्मा, गोकर्ण विष्ट, पम्फा भुसाल, युवराज ज्ञवाली, भिम आचार्य सहित १८ जना नेता बोलेका थिए ।
आइतबार एक कार्यक्रममा प्रधानमन्त्री ओलीले नक्सा जारी गरेबापत भारतीय संयन्त्र र आफ्नै पार्टीका नेताहरु सरकार ढाल्न सक्रिय रहेको भन्ने अभिव्यक्ति दिएका थिए । त्यसबारे बैठकको सुरुमै अध्यक्ष दाहालले जावाफ मागेका थिए ।
