बुटवल। जेठ २९ । समाजवादी पार्टीले सरकारले अघि बढाएको संविधान संशोधन प्रस्ताव विरुद्द संशोधन दर्ता गरेको भन्दै आफ्नो दलकी सांसद सरिता गिरिलाइ कारवाही गर्ने चेतावनी दिएको छ ।
संविधानमा रहेको निशान छापमा नयाँ नक्सा समेट्न सरकारले ल्याएको संशोधनमाथि संशोधन प्रस्ताव दर्ता गराएकी गिरीलाई प्रस्ताव फिर्ता लिन पनि समाजवादी पार्टीले निर्देशन दिएको छ।
प्रमुख सचेतक उमाशंकर अरगरियाले पार्टीका तर्फबाट गिरीलाई संशोधन प्रस्ताव फिर्ता लिन निर्देशन दिएका हुन् । उनले संशोधन फिर्ता नलिए कारवाही गरिने बताए ।
सांसद गिरीले नयाँ नक्सालाई नेपालको निशान छापमा समेट्न सरकारले ल्याएको विधेयकको विरोध जनाउँदै संशोधनको माग गरेकी छन् ।
उनले संशोधनमा लिम्पियाधुरा र लिपुलेक समेट्न स्रोत र प्रमाण नखुलेको भन्दै आएकी छन् ।
