एमालेलाई रोजेको पार्टी प्रवेश गर्नेहरु भन्छन एमाले बाहेक मुलुको हित हुन सक्दैन
सैनामैना, कार्तिक १६ । रुपन्देहीको सैनामैना नगरपालिका वडा नं. ५ बुद्धनगरमा विभिन्न पार्टी परित्याग गरेर ५१ जना नेकपा एमालेमा प्रवेश गरेका छन् । मुलुकको विकास र समृद्धि, राष्ट्रियताको रक्षाको लागि मंसिर ४ गते हुने प्रतिनिधि तथा प्रदेश सभा निर्वाचनमा नेकपा एमालेलाई जिताउनु पर्ने निष्कर्षका साथ एमालेलाई रोजेको पार्टी प्रवेश गर्नेहरुले बताएका छन् ।
कार्यक्रममा एमालेका नेताहरुले क्षेत्र नं. ५ का बासिन्दाले योग्य र विकासप्रेमी जनप्रतिनिधि चाहेकोले पार्टीले सोहीअनुसार उम्मेदवार उठाएको बताउँदै चुनावी अभियानमा जुट्न कार्यकर्ताहरुलाई निर्देशन दिनुभयो । सो अवसरमा प्रतिनिधिसभा सदस्य पदका उम्मेदवार बासुदेव घिमिरेले मुलुकको विकास र समृद्धिको लागि नेकपा एमालेको विकल्प नभएको बताउँदै क्षेत्र नं. ५ लाई विकासमा नमूना बनाउने आफ्नो स्पष्ट भिजन रहेको बताउनुभयो । यस्तै प्रदेशसभा सदस्य पदका उम्मेदवार भूमिश्वर ढकालले सत्तामा भएर पनि एमालेसँग एकल चुनाव लड्ने आँट नभएकोले नेपाली काँग्रेसले धेरै पार्टी मिलाएर गठबन्धन गरेको चर्चा गर्दै एमालेको जित सुनिश्चित गर्न मतदाता जाग्नु पर्ने समय आएको बताउनुभयो ।
कार्यक्रममा पार्टीका जिल्ला उपसचिव चित्रबहादुर कार्कीले सैनामैना नगरपालिकामा एमालेको नेतृत्व रहँदा सुरु भएका सैनामैना चक्रपथलगायतका विकासका कामलाई अघि बढाउन समेत एमाले उम्मेदवारलाई जिताउनुको विकल्प नरहेको स्पष्ट पार्नुभयो । पार्टी प्रवेश गरेका राजु थारुले आफ्नो क्षेत्रमा एमाले पार्टीले विकासको लागि महत्वपूणर् काम गरेकोले आफूहरु राजी खुसी पार्टी प्रवेश गरेको बताए ।
