काठमाडौं । पुस २३ । राष्ट्रिय सभाका १९ सिटका लाग हुन लागेको निर्वाचनमा ५२ जनाले उम्मेदवारी दर्ता गराएका छन् । सातै प्रदेश मुकाममा उम्मेदवारी दर्ता आज सोमबार बिहान १० बजे देखि ३ बजेसम्म तोकिएको थियो। सत्ता गठबन्धनका दलहरुबीच सहमतिको आधारमा सिट भागवण्डा भएको छ।
आगामी माघ ११ गते राष्ट्रिय सभा निर्वाचनका लागि मतदान हुनेछ । निर्वाचन आयोगले सातै प्रदेशमा महिलातर्फ १८, दलित समूहतर्फ ५, अपाङ्गता वा अल्पसंख्यक समुदायतर्फ ८ र अन्यतर्फ २१ गरी जम्मा ५२ जना उम्मेदवारको मनोनयनपत्र दर्ता भएको जनाएको छ । कोशी प्रदेशमा ५ जनाको, मधेश प्रदेशमा पनि ५ जनाको र बागमतीमा १५ जना उम्मेदवारको मनोनयनपत्र दर्ता भएको निर्वाचन आयोगले जनाएको छ । यसैगरी गण्डकी प्रदेशमा ८, लुम्बिनी प्रदेशमा ७ जना, कर्णाली प्रदेशमा ६ जना र सुदूरपश्चिम प्रदेशमा ६ जना उम्मेदवारको मनोनयनपत्र दर्ता भएको छ । उम्मेदवार उपर पुस २४ गते विरोधमा उजुरी दिने, पुस २५ र २६ गते उजुरी उपर जाँचबुझ गरी नामावली प्रकाशित गर्ने, पुस २७ गते उम्मेदवारको नाम फिर्ता तथा अन्तिम नामावली प्रकाशन र पुस २८ गते उम्मेदवारलाई निर्वाचन चिह्न वितरण गर्ने निर्वाचन आयोगले जनाएको छ ।
