काठमाडौं । प्रधानमन्त्री पुष्पकमल दाहालले वैदेशिक रोजगारीका स–साना कामका लागि पनि काठमाडौं धाउनुपर्ने परिस्थितिको अन्त्य गर्नुपर्ने बताएका छन् । सम्भव हुने सबै सेवाहरू स्थानीय तहबाटै दिने व्यवस्था मिलाउन पनि प्रधानमन्त्रीले निर्देशन दिएका छन्। सिंहदरबारमा आयोजित श्रम, रोजगार तथा सामाजिक विकास मन्त्रायलयसँगको छलफलमा प्रधानमन्त्री दाहालले वैदेशिक रोजगारीमा जाने युवा मिटरब्याजी र दलालहरूबाट ठगिएको बताए । सरकारले नै सस्तो ब्याजमा ऋण दिने व्यवस्था मिलाउन पनि प्रधानमन्त्री दाहालले मन्त्रालयलाई निर्देशन दिएको उनको सचिवालयले जानकारी दिएको छ। प्रधानमन्त्रीले सामाजिक सुरक्षा कोषमा आबद्धता र विस्तारलाई प्राथमिकताका साथ कार्यान्वयन गर्न समेत मन्त्रालयलाई निर्देशन दिए। प्रधानमन्त्रीले ७५३ वटै स्थानीय तहबाट पुनः श्रमस्वीकृतिको व्यवस्था मिलाउन निर्देशन पनि दिएका छन्।
