बुटवल– आज माघ १ गते अर्थात् माघे सङ्क्रान्ति। सूर्य धनु राशिबाट मकर राशिमा प्रवेश गर्ने सङ्क्रान्ति भएकाले माघ १ गतेलाई मकर सङ्क्रान्ति पनि भनिन्छ। माघ १ गतेदेखि सूर्य उत्तरायण हुने भएकाले दिनभन्दा रात छोटा हुँदै जान्छन्। आजको दिन स्नान,साधना, दान आदि गर्नाले पुण्य हुने मानिन्छ। आजको दिन गुल्मी, पाल्पा र स्याङ्जाको संगम रिडी, त्रिवेणी, देवघाट, त्रिशूली, कालीगण्डकी, वाग्मती, इन्द्रावती लगायतका स्थानमा माघ स्नान गर्ने भक्तजनको भीड लाग्छ । रिडीमा विशेष मेलासमेत लाग्ने गर्छ। तराई मधेसमा माघ १ लाई नहान अर्थात् नुहाउने पर्वका रूपमा मनाइन्छ । तीर्थस्थलमा गई स्नान गरेर तिल दान गर्नाले सुन दान गरेसरहको पुण्य प्राप्त हुने धार्मिक विश्वास छ। माघे सङ्क्रान्तिमा घ्यू, चाकु, तिलका परिकार, खिचडी खाने गरिन्छ । थारु समुदायको मुख्य पर्व माघी पनि आजै हो। मगरहरूले पनि माघी महत्वका साथ मनाइरहेका छन्।
