बुटवल । राष्ट्रिय सभाका १९ सदस्यका लागि भएको चुनावमा १८ जना
सत्ता गठबन्धनका उम्मेदवार विजयी भएका छन् ।
कोशी प्रदेशमा भने सत्ता गठबन्धनबाट उम्मेदवार बनेकी माओवादी केन्द्रकी चम्पादेवी कार्कीलाई पराजित गर्दै एमालेकी रुक्मिणी कोइराला निर्वाचित भएकी छन् । कोशीमा माओवादी केन्द्रकी उम्मेदवारलाई गठबन्धनकै मतदाताले मत दिएनन् । अर्थात समीकरण अनुसार धोका दिएका छन् ।
राप्रपा र एमाले गठबन्धनबाट उम्मेदवार बनेकी कोइरालाले कार्कीलाई झण्डै सय मतभारले हराएकी हुन् ।
कोशीको अर्को सदस्यमा नेपाली कांग्रेसका उम्मेदवार कृष्णप्रसाद सिटौला निर्वाचित भए ।
निर्वाचनमा लुम्बिनी प्रदेशबाट सत्ता गठबन्धनका उम्मेदवारले जिते । महिलातर्फ गुल्मीकी नेपाली कांग्रेसकी नेता विष्णुकुमारी सापकोटा ५ हजार ४३५ मत भार प्राप्त गरिन । नेकपा एमालेकी तुलसा केसीले २ हजार ८६७ मतभार पाइन ।
अन्य तर्फ रोल्पाका माओवादी केन्द्रका नेता झक्कुप्रसाद सुवेदी निर्वाचित भए । उनले नेकपा एमालेका पाल्पाका नेता झपेन्द्र जीसीलाई हराएका हुन् ।
यसैगरी मधेश प्रदेशबाट राष्ट्रियसभा सदस्यमा सत्तारुढ गठबन्धनका आनन्दप्रसाद ढुंगाना र पूजा चौधरी निर्वाचित भएका छन् ।
यस्तै ३ सिटको लागि गण्डकीमा भएको निर्वाचनमा सत्तारुढ गठबन्धनबाट कांग्रेसबाट किरणबाबु श्रेष्ठ र पदमबहादुर परियार तथा माओवादीबाट मनरुपा शर्मा निर्वाचित भए ।
बागमती प्रदेशबाट सत्ता गठबन्धनका चारैजना उम्मेदवार विजयी भएका छन्।
महिलातर्फ नेपाली कांग्रेसका विष्णुदेवी पुडासैनी, दलिततर्फ एकीकृत समाजवादीका घनश्याम रिजाल विश्वकर्मा, अन्यतर्फ नेपाली कांग्रेसका उम्मेदवार जीतजंग बस्नेत र अल्पसंख्यक तथा अपांगतातर्फ माओवादी केन्द्रका श्रीकृष्ण अधिकारी निर्वाचित भएका छन् ।
यस्तै सुदूरपश्चिमा नेपाली कांग्रेसबाट नारायणदत्त भट्ट र बलदेव बोहरा तथा माओवादी केन्द्रबाट रेणु चन्द विजयी भए । उनीहरु सत्ता गठबन्धनका उम्मेदवार हुन् ।
यसैगरी कर्णालीमा पनि सत्ता गठबन्धनका तीनै जना उम्मेदवार निर्वाचित भएका छन् । महिलातर्फ नेकपा एकीकृत समाजवादीकी सावित्री मल्ल, दलिततर्फ नेकपा माओवादीका विष्णु विक ‘विकल्प’ र अन्य तर्फ नेपाली कांग्रेसका कृष्णबहादुर रोकाया निर्वाचित भएका छन्।
