बुटवल, २५ पुस । रुपन्देहीमा सम्पन्न मदन भण्डारी गोल्डकप इन्डो–नेपाल रनिङ शिल्ड पुरुष भलिबल च्याम्पियनसिप–२०८१ को उपाधि त्रिभुवन आर्मी क्लबले चुमेको छ । विहिबार भएको निक्कै प्रतिर्स्प्रात्मक फाईनलमा अर्को विभागिय टिम नेपाल पुलिस क्लबलाई ३–२ को सेटमा पराजित गर्दै उपाधि चुमेको हो । उपाधिसंगै आर्मीले नगद ७ लाख, आर्कषक १५ केजीको रनिङशिल्ड, मेडल, प्रमाणपत्रबाट पुरस्कृत भयो । 
साथै हङकङ निवासी खेलप्रेमी बिष्णु बहादुर गुरुङ (ठुले) ले आयोजकमार्फत उपाधी विजेता टिमलाई थप नगद १ लाख ५ हजार रुपैया हस्तान्तरण गरेका छन । उपविजेता पुलिस भने नगद ३ लाख ५० हजार, कप, मेडल, प्रमाणपत्रमा चित्त बुझायो । बुटवलको मणिमुकुन्द भलिबल क्लब तेस्रो हुदै नगद १ लाख ७५ हजार तथा भारतको गुजरात भलिबल क्लब चौथौ हुदै नगद १ लाख रुपैयाबाट पुरस्कृत भएको छ । करीब पाच हजार बढी दर्शकले भरिभराउ रामनगर खेलमैदानमा दर्शकको साथ पाएको नेपाल पुलिस क्लबले लगातार अग्रतासंगै पहिलो सेट २५–१८ अंकले आफनो पक्षमा पारेको थियो । दोस्रो सेट भने आर्मीले फर्काउन सफल भयो । 
समान २५–१८ अंकसहित आर्मीले दोस्रो सेट जित्दै खेल बराबरी ल्यायो । लगत्तै तेस्रो सेटमा पुलिस उत्कृष्ट खेल प्रदर्शन गर्दै २५–२१ अंकसहित पुन खेलमा टिमलाई अग्रता दिलायो । चौथो सेटमा आर्मी खेलमा फर्कियो । २५–२२ अंकसहित चौथो सेट जित्दै आर्मीले खेललाई पाचौ सेटमा थकेल्यो । निर्णायक पाचौ सेटमा आर्मी शुरुवातबाट नै हाबी देखियो । उत्कृष्ट स्पाईकसहित सेट १५–७ अंकले जित निकाल्दै उपाधि हात पार्न सफल भयो । प्रतियोगितामा आर्मीका धन बहादुर भट्ट मोस्ट भेलुएबल प्लेयर घोषित हुदै नगद २५ हजार, गिफट हेम्परबाट पुरस्कृत भए । पुलिसका सन्जु बिक्रम शाह उत्कृष्ट आउटसाईड हिटर, रबिन चन्द उत्कृष्ट अपोजिट हिटर, रबिन नगरकोटी उत्कृष्ट मिडल ब्लकर, त्रिभुवन आर्मीका दुर्गा प्रसाद महतो उत्कृष्ट सेटर, त्रिभुवन आर्मीकै ईश्वर थापा उत्कृष्ट लिबेरो, आर्मीकै लोक बहादुर बुढा उत्कृष्ट कोच घोषित हुदै नगद १० हजार रुपैयासहित गिफट हेम्परबाट पुरस्कृत भए ।
एक समारोहका बिच लुम्बिनी प्रदेशका पूर्व मुख्यमन्त्री लिला गिरी, नेकपा एमाले पोलिटब्युरो सदस्य दधिराम न्यौपाने, जिल्ला खेलकुद विकास समिति रुपन्देहीका पूर्व अध्यक्ष राजु गुरुङ, पूर्व क्रिकेटर तथा कोच शक्ति गौचन, मदन भण्डारी स्पोट्र्स एकेडेमीका अध्यक्ष ध्रुव आचार्यले विजेता, उपविजेता तथा उत्कृष्ट खेलाडीहरुलाई पुरस्कार वितरण गरे । प्रतियोगितामा नेपाल र भारतका ८ टिमको सहभागीता रहेका थिए ।
