बुटवल, फागुन २३ । बुटवल–७ दीपनगरस्थित पुष्प बहुउद्देश्यीय सहकारी संस्थाले ‘डेरी पसल’ सञ्चालनमा ल्याएको छ । लुम्बिनी बिशिष्टिकृत सहकारी संघले उत्पादन गरेको दुध तथा दुग्धजन्य पदार्थ बिक्री बितरणका लागि डेरी सञ्चालन गरीएको हो । शुक्रबार एक कार्यक्रमको आयोजना गरी जिल्ला सहकारी संघ रुपन्देहीका अध्यक्ष तथा राष्ट्रिय सहकारी महासंघ नेपालका लेखा सुपरिवेक्षण समिति संयोजक भिम तुलाचनले उद्घाटन गरे ।
सोही अवसरमा बोल्दै उनले निर्मलीकरण गरीएको दुध मानव स्वास्थ्यका लागि स्वस्थकर हुने बताए । लुम्बिनी बिशिष्टिकृत सहकारी संघले उत्पादन र बिक्री बितरण गर्ने दुध तथा दुग्धजन्य सामाग्रीहरु गुणस्तरीय रहेकोले ढुक्क भएर प्रयोग गर्न उपभोक्तालाई आग्रह गरे । लुम्बिनी विशिष्टिकृत सहकारी संघका अध्यक्ष ज्ञानु पौडेलले डेरी व्यवसाय पवद्र्धनका लागि उच्च प्रविधिमार्फत डेरी उद्योग सञ्चालन गरी दुध र दुग्धजन्य सामाग्रीहरु उत्पादन तथा बिक्रीवितरण गर्दै आएको बताइन् । 
उद्योग सञ्चालनमा आएको छोटो समयमै साढे ४ लाख लिटर दुध संकलन भइसकेको बताउँदै उनले पशुपालक किसानलाई समेत सहज भएको बताइन् । संकलन भएको सबै दुध तत्काल बिक्री नहुने भएकोले पाउडर प्लान्ट स्थापना गर्ने तयारी गरीएको अध्यक्ष पौडेलले बताइन् । उनका अनुसार हाल संघमा १४५ वटा सहकारी संस्था सदस्य रहेका छन् । संघले ‘मिल्क एटिएम’ सञ्चालनमा ल्याउने तयारी गरेको उनले बताइन् । पुष्प बहुउद्देश्यीय सहकारीका अध्यक्ष रामप्रसाद पाण्डेले सहकारीले उत्पादनमुलक क्षेत्रमा लगानी गरी सदस्यहरुलाई आर्थिक समृद्धीसँग जोड्ने काम गर्दै आएको बताए । दुध, दही, घ्यु, मोही, पनिर, नौनी लगायतका दुध र दुधबाट बनेका सबै किसिमका गुणस्तरीय उत्पादनहरु पाइने उनले बताए । सहकारीका शेयर सदस्यसमेत रहेकी डेरी सञ्चालक कल्पना घिमिरेले सहकारीबाटै व्यवसायमा जोडिन पाएकोमा खुसी व्यक्त गरीन् । कार्यक्रममा सहकारीका सल्लाहकार उमाकान्त बस्याल, लुम्बिनी विशिष्टिकृत सहकारी संघका महाप्रबन्धक अर्जुन अधिकारी लगायतले बोल्दै अन्य सहकारी संस्थाहरुले पनि सदस्यहरुलाई व्यवसायीक र आत्मनिर्भर बनाउने खालका कार्यक्रम सञ्चालन गर्नुपर्ने बताए । पुष्प सहकारी लुम्बिनी बिशिष्टिकृत सहकारी संघको सदस्य पनि हो । २०५७ सालमा स्थापना भएको सहकारीमा हाल ९३० जना शेयर सदस्य तथा १५ करोड शेयर पुँजी रहेको व्यवस्थापक सरस्वती पाण्डे न्यौपानेले जानकारी दिइन । कार्यक्रममको सञ्चालन सहकारीका सचिव कल्पना थापाले गरेकी थिइन् ।
