बुटवल । क्यान विटुसी समिट बुटवलमा सुरु भएको छ । कम्युटर एशोसिएसन अफ नेपाल (क्यान) महासंघ रुपन्देहीको आयोजनामा बुटवलमा सुरु भएको बिटुसी समिट दुई दिनसम्म चल्ने छ । मंगलबारसम्म चल्ने सम्मेलनको बुटवल उपमहानगरपालिकाका प्रमुख खेलराज पाण्डेयले शुभारम्भ गर्नु भएको छ । नगरप्रमुख पाण्डेयले डिजिटल प्रविधिको प्रयोग गरी डिजिटल हस्ताक्षर गरी ल्यापटमा क्लीक गर्दै उहाँले सम्मेलनको शुरुवात गर्नु भएको हो । समिटको उद्घाटन गरेका नगर प्रमुख पाण्डेयले अवको युग सूचना प्रविधिको युग भएको कारण सूचना प्रविधि विना अवको युग परिकल्पना गर्न पनि नसकिने बताउनुभयो ।
उहाँले सूचना प्रविधिमा पहुँच नभएका व्यक्तिले कोरा शिक्षा हासिल गरे सरह हुने भन्दै उहाँले सकेसम्म सुचना प्रविधिको अधिकतम प्रयोग गर्न सुझाव दिनुभयो । उहाँले सुचना प्रविधिमा दख्खल नभएको मानिस पछिल्लो प्रतिष्पर्धी समाजमा काम गर्न नसक्ने र बेरोजगार हुने अवस्था सृजना हुने तर्क राख्नुभयो । मेयर पाण्डेयले बुटवलमा सूचना प्रविधिको क्षेत्रमा नयाँ अभ्यासलाई लागू गर्दै अगाडी बढेको स्मरण गर्दै घरबाट नै सेवा ग्राहीले सेवा लिन पाउने, गरी पोर्टल सहित सफ्टवेर विकास गरेर काम गर्दै आएको बताउनुभयो । उहाँले नक्सा पास देखि लिएर, सिफारिस, राजश्व लगायतका प्रणाली नगरपालिकाले विस्तारै डिजटललाईजेशनमा अगाडी बढेको बताउनुभयो । उहाँले हरेक ब्यक्तिले कार्यकुशलता प्रदर्शनको लागि क्यासलेस, बैंकीङ्ग प्रणाली सहित अनलाईन सूचना प्रणालीमा सबैजना आवद्ध हुनुपर्ने कुरामा जोड दिनुभयो । कार्यक्रममा उप–प्रमुख सावित्रादेवी अर्यालले महिला उद्यमशिलता सहितको सूचना प्रविधिमा जोडीनुपर्नेमा जोड दिनुभयो । 
महिला प्रविधि र सीपसँग जोडिनु पर्ने उल्लेख गर्दै सुचना र प्रविधिको विकाससँगसँगै महिलापनि जोडिनु पर्ने सुझाव राख्नुभयो । कार्यक्रममा क्यान महासंघ नेपालका पुर्व केन्द्रीय अध्यक्ष रञ्जीत कुमार गोदारले डिजिटल नेपाल निर्माणमा सबैजनाको विचमा सहकार्य जरुरीरहेको बताउनुभयो । यस्तै कार्यक्रममा बुटवल उद्योग बाणिज्य संघका अध्यक्ष हरिप्रसाद अर्यालले नीजी क्षेत्रको सूचना प्रविधि क्षेत्रमा ठुलो योगदान रहेको भन्दै सरकार, नीजी क्षेत्रको विचमा सहकार्य आवश्यक रहेको बताउनुभयाो । क्यान महासंघ रुपन्देहीका अध्यक्ष जीवन अधिकारीलेसमिटमा हार्डवेयर, पावर सोलुसन, सफ्टवेयर र विभिन्न इन्नोभेसन प्रदर्शन गरिएको जानकारी दिनुभयो । कार्यक्रम संयोजक तथा क्यान रुपन्देहीका उपाध्यक्ष विरबहादुर क्षेत्रीका अनुसार समिटमा ५ हजार दर्शकले अवलोकन गर्ने अनुमान गरिएको छ ।
समिटमा प्राविधिक क्षेत्रमा अध्ययन गरेका विद्यार्थी र नीति निर्माण तहका जनप्रतिनीधि तथा अधिकारीहरु तथा उपभोक्ताहरु सहभागि हुने पनि उहाले जानकारी गराउनुभयो ।क्यान रुपन्देहीका सचिव सुरेशचन्द्र भट्टराईका अनुसार समिटमा ब्रान्ड लक्षित कार्यक्रम रहेका छन् । ब्राण्डको प्रमोशन मात्रै गर्नेगरी कार्यक्रमको मोडेल बनाईएकाले खरिद बिक्रि हुनेछैन । त्यस्तै समिटमा उत्पादक तथा इम्पोटर बिच अन्तरक्रिया कार्यक्रम गरिने छ । समिटमा नेपाल टेलिकमले निःशुल्क सिम वितरण गर्नेछ भने आफ्नो सिमकार्डलाई ईसिममा परिवर्तन गर्न सकिने पनि सो अवसरमा सचिव भट्टराईले जानकारी दिनुभयो । मंगलबार सम्म चल्ने मेलामा विभिन्न सुचना प्रविधिका नयाँ आविश्कारहरु राखिएको छ ।
