काठमाडौ। त्रिभुवन विश्वविद्यालय भौतिकशास्त्र केन्द्रीय विभागले प्राकृतिक रुपमा उपलब्ध जुडीबुटीमा पाइने लिगाण्डले कोरोना भाइरसलाई कमजोर पारेर औषधिको रुपमा काम गर्न सक्ने पत्ता लगाएको छ ।
त्रिवि भौतिकशास्त्र केन्द्रीय विभागका प्राडा नारायणप्रसाद अधिकारी मुख्य अनुसन्धानकर्ता र प्राडा रामेश्वर अधिकारी तथा डा नुरापति पन्थ सहअनुसन्धानकर्ता रहेको समूहले ३ वर्ष लगाएर गरेको कोभिड १९ को प्रभाव कम गर्ने उपाय र औषधि चयनका प्राकृतिक तत्वहरुको वैज्ञानिक अनुसन्धानको नतिजा सार्वजनिक गरेको हो ।
काठमाडौंमा आयोजित कार्यक्रममा उक्त अध्ययनमा एक दर्जनभन्दा बढी प्राध्यापक तथा अनुसन्धानकर्ताको संलग्नता रहेको जानकारी दिइयो । प्राडा नारायणप्रसाद अधिकारीले अनुसन्धानका निष्कर्षहरुको विश्लेषण गर्नुभएको थियो । उहाँले प्राकृतिक रुपमा उपलव्ध जडीबुटीमा पाइने तत्व लिगाण्डले भाइरस र प्रोटीनको एकीकरणलाई कमजोर पारेर औषधीको रुपमा कार्य गर्नसक्ने बताउनुभयो । यो औषधि विज्ञान तथा नवीन फार्मास्यूटिकल विकासमा महत्वपूर्ण कार्य रहेको अनुसन्धानकर्तारुले बताए ।
सहअनुसन्धानकर्ता प्राडा रामेश्वर अधिकारीले अनुसन्धानका नतिजारुलाई औषधि उत्पादनसँग जोड्न राज्यका निकायहरुबीच समन्वय हुनुपर्ने बताउनुभयो ।
यसैगरी अर्का सहअनुसन्धानकर्ता डा पन्थले कार्यक्रम र अनुसन्धानको महत्वबारे प्रकाश पार्नुभएको थियो । त्यस अवसरमा अनुसन्धान निर्देशनालयका निर्देशक प्राडा ईश्वर कोइराला, विज्ञान तथा प्रविधि अध्ययन संस्थानका निवर्तमान डीन प्राडा विनिल अर्याल, स्वास्थ्य सेवा विभागका प्रमुख ऋतुराज पन्थ, नाष्टका प्रतिनिधि डा बुद्दराज शाह लगायतले टिप्पणी र सुझावहरु राख्नुभएको थियो ।
